La shah die thiat shna kyiad ha East Jaintia Hills

Syllad | The Rising MeghalayaApril 24, 2020

U Deputy Commissioner ka East Jaintia Hills District ula pynbna paidbah ba la pynjynsur ïaka ‘CURFEW’ ha East Jaintia Hills District naduh ka Sngi nyngkong (Monday) haduh ka sngi Thohdieng (Friday) khnang ba ki nongshong shnong kin lah biang ban thied ia ki jingdonkam ba manla ka sngi (Essential Commodities).

Baroh ki FPS ne ki dukan rashon ba kynthup iaka NFSA bad Non NFSA kin plie iaki dukan ha manla ki shnong ban sam pyndep ia u khaw rashon ba dang sah manla ka sngi naduh ka por 9AM haduh 4PM.

La shah ruh ban plie ia ki iaki dukan hapoh ki shnong lajong lajong naduh ka por 10 baje mynstep haduh 1baje mynsngi man la ka sngi, naduh ka sngi nyngkong (Monday) haduh ka sngi Thohdieng (Friday) khnang ban ailad ia ki trai shnong ban thied jingthied.

Kiwei ki Dukan ba shah ban plie:

Kine ki dukan ba la shah ban plie ha shnong ki dei  ki dukan die jhur, dukan die soh bad dukan die kwai bad tympew, dukan die doh dohkha, dohsniang, dohsyiar, pylleng, die ktung, dukan die marbam mardih (grocery shops). dukan die dawai (pharmacy) bad dukan die departmental store.

Kiwei pat ki dukan ki kynthup iaki dukan die bam dihsha (confectionery shops), dukan die cosmetics, dukan die mar khyllung (baby items shops), dukan die gas (LPG station).

Dukan die jingbam ri-jingri bad dukan ai jingsumar ia ki jingri jingdup (animal feeds and supplies), dukan die umphniang kali (petrol bad diesel) bad phniang sharak (SK oil), dukan die kot (stationary shops) bad dukan die torch light, emergency lights, dukan die shatri bad rain coats, dukan die thiat (yeast) bad dukan die sboh ha ka rep ka riang, dukan die dud bad dukan die dawai pyniap khniang (pesticides & insecticides, dukan die symbai thung jingthung (seeds and seedlings), dukan shna truck harud surok bah (highways), dukan die tiar lights (electrical shops), dukan couriers services bad Common Services Center (CSC’s), dukan die shna kti ( khoh, star, mohkhiew, wait etc).

Shuh shuh, ia ki dukan Whole Sale pat ha iew Umpleng (Cement Market) yn shah ban plie ruh manla ka sngi Nyngkong (Monday), sngi ba–Ar (Tuesday), sngi Balang (Wednesday) bad sngi Palei (Thursday) naduh ka por 2PM haduh 4PM tang na ka bynta ban iarap ia ki nongthied jingthied ba na ki thain Saipung, Muallian shaneng da ka jingpynbeit bad ka jingbthah bala pynmih da kane ka Ophis. Katba, ia ki dukan wholesale pat kiba ha Lad Rymbai, Khliehriat, Sookilo yn shah ban plie manka sngi naduh ka Sngi Nyngkong (Monday) haduh ka Sngi Thohdieng (Friday) naduh ka por 2PM haduh 4PM ban iarap ia ki nongwan thied jingthied na ki shnong ba jngai na ki thain khappud Assam bad Bangladesh da ka jingpynbeit bad ka jingbthah bala pynmih da kane ka Ophis. 

U Deputy Commissioner u la pyntip ruh ba ki jaka siew Bill Light jong ka MeECL kan long ha man la ki Community Hall jong ki shnong naduh ka por 9 PM haduh 4 PM da ka jingia sngewthuh lang ki bor pyniaid shnong bad ka Ophis MeECL.

Ki Bank hapoh East Jaintia Hills ki lah ban plie naduh ka por 10AM haduh 4PM ban iarap ia ki nong leit donkam ha ki Bank da ka jingsngewthuh lang, jingpynbeit lang bad ki bor pyniaid shnong ki ba hap hapoh ka service area jong ki Bank ban ai jingtip kaba tikna ba ha ka shi sngi yn plie ia ki Bank tang na ka bynta ki katto katni ki shnong khnang ban lait na ka jingbun briew bad jingkhapngiah (Cluster of village approach).

Ki Rangbah shnong ryngkat ka jing iatreilang ki VDP, Seng samla, ki pulit kin pyniaid ryntih ia ka jingleit thied jingthied jong ki paitbah na ki dukan bad ban bud ia ka jing pynjngai iwei na iwei kumba 3 phut (Social Distancing)  kumba la bthah da ka sorkar lyngba ka Health Department.

La bthah kyrpang ia baroh ki shnong ki dei ban pyndonkam ia ki VDP ne ki Volunteer na shnong ban iatreilang bad ka tnad pulit ha ka ban pyniad beit ia ki iew katkum ka jingbthah jong ka sorkar. Ban pyntikna ba ym dei ban ialum khapngiah ne ban iaknieh bad khih khohreh ha kano kano ka dukan bad ba ki kali kim dei ban iaid ne ieng ha ka por ba shah ban plie dukan khamtram ha kane ka por ba dang hap hapoh ka Curfew. 

La bthah kyrpang ban mih tang iwei ne arngut shi ïing lada donkam eh ban thied jingthied, baroh ki dukan die jingdie ki dei ban iajngai kumba 1 meter ei ei na kawei ka dukan ha kawei pat ka dukan abd ban lehkhuid da kaba sait bha ia ki kti da ka um bad sabob hashwa bad hadien bala iadie iathied, La maham ruh ia ki nongdie ba kim dei kim dei ban die palat dor ia ki marbam mardih.

Kumjuh ruh, baroh ki dukan ki dei ban pynbiang ia ki jaka theh niut (Dustbin) ha ki jaka ba ki die jingdie, ki dei ban lehkhuid bad kim dei ban ieh ia ki jakhlia ne ki niut hakhmat ki dukan jong ki hynrei ban bret ia ki ha ki jaka ba dei ban bret da ka jingiasngewthuh lang bad ki nong pyniaid shnong. Ki Bor shnong ki dei ban iatreilang bad ki bor District kumjuh ruh bad ki bor pulit bad ki  dei ban bud ryntih ia ka jing ia ieng iajngai iwei na iwei pat (social distancing).

Ki kyndon ki ba ki dei ban leh kilong ban long kiba lehkhuid bad ieng ia jngai iwei na iwei pat bad ban sait kti man ka por, baroh kiba leit thied jingthied kidei ban bud ia ki jingbthah jong ka Sorkar bad ban bret ia ki niut tang ha ki jaka ba dei ban bret.

Ki kyndon ba ym bit ban leh ki long ban ia khublei kti, ban iajan badno re badno kiba don jyrhoh ne jingshit ka met, ban ktah ia ka ktien, ka khmut bad ka khmat da ki kti bym pat sait bha bad ban synriah ne jyrhoh ha kti khlem da tap ia ka khmut bad ktien, ban biah ha ki jaka paitbah.