La shah ia ki kali kit tyndong lyer shet, Petrol bad Diesel ban iaid lyngba ka jingkieng Damsite

Syllad | The Rising MeghalayaDecember 16, 2023

Ka District Magistrate ka East Khasi Hills District ka la shah ia ki kali kiba kit ia ki Tyndong lyer shet bad ki kali kit umphniang Petrol bad Diesel ba kin iaid lyngba ka jingkieng Damsite ne Umiam Bridge kaba dang don mynta hapdeng ka jingmaramot.

Hynrei, watla katta ka la ong ba kine ki kali ki dei ban don ia ki challan kiba biang napoh Umling Weight Bridge ban pynthikna ha kaba iadei bad ka jingkhia jong ki jingkit kaba dei ban long hapoh jong ka 15 Metric Ton.

Kane ka jingpynbna ka dei shibynta ka jingpynbeit thymmai ia ka hukum ba la pynmih ha ka 14 tarik Nohprah 2023 bad ban bteng ban pyntreikam ia ka hukum ba la pynmih ha ka 3 tarik u Nohprah 2023.

Kham hashwa na ka liang ka District Magistrate ka EKHD ka la shah bad pyllait tang ia ki bus kit paidbah ne bus kamai bad ia ki kali rit ne LMV ba kin iaid lyngba kane ka jingkieng Umiam.

Katkum katei ka hukum la kdew ruh ba ki kali heh ne ki Heavy Motor Vehicle (HMV) bad kiba pdeng ne (Medium Motor Vehicle) na kiwei pat ki district kum napoh West Jaintia Hills District bad East Jaintia Hills District kin hap ban iaid lyngba na Mawryngkneng lyngba ka surok Shillong Bypass.

Kumjuh ki kali na ka thain West Khasi Hills, South West Khasi Hills bad Eastern West Khasi Hills District kin hap ban iaid lyngba na Pomlakrai / Mawryngkneng sha Shillong Bypass.