La shibnai tam duh bording ka Khliehriat West ong ka JNC

Syllad | The Rising MeghalayaMay 5, 2020

Da ki spah tylli ki longïing mynta ki hap ban shong haka jingdum ha ka shnong Khliehriat West, Khliehriat East Jaiñtia Hills la shibnai tam tang namar bym shimkhia ka tnad MePDCL ban maramot ia u transformer la kynnoh ka Jaintia Nation Council (JNC) – Khliehriat Circle.

Ka JNC kala ong ba kane ka jingduh bording kitei ki longïing ka dei tang ba duh u transformer hajan ka Khliehriat West Iawpynkat U.P School bad kane ka jingduh bording kala sdang naduh ba sdang ka lockdown.

U President JNC-KC, Rimiki Dkhar, ula buh jingkylli kumno kane ka tnad kaba dei kawei na ki tnad kaba kongsan kam shym la shimkhia satia ban pynbiang ïaka jingdonkam u paidbah ha kum kane ka por ka khim ka khait. Ula ong ba mynta ba nalor ba ki paidbah ki hap ban pynbiang ka bam ka dih, hynrei mynta kin hap ban khuslai jingmut ban pynbiang ïa u rnga ban shet ban tiew bad ki mombati bad sharak ban ïoh jingshai kaba la nang pynbun ïaka jinglut jingsep.

Ula ong ba ka JNC hadien ba kala ioh ka jingujor na ki paidbah halor kane ka jingduh bording kala ujor sha u Executive Engineer MePDCL Khliehriat Distribution Division bad la phah ruh sha u DC ka East Jaintia Hill bad ki heh jong ka MepDCL ban shimkhia ban maramot ïaka bording khnang ban myntoi u paidbah.

Bun ki paidbah kila ud kila nam halor kane, hynrei ka tnad MePDCL kala leh kuman ban maramot ia kane ka lain bording watla ka jingduh kane ka bording ha katei ka shnong kala duh la shibnai tam.

Ka JNC kala kyntu ïaka tnad ban maramot katba lah kloi bad ban map ïaka bill light jong ki ki paidbah kiba shah ktah na kane ka jingduh bording.