La tep don burom ïa ka met u samla kiew lum u Tiklu Jyrwa

Syllad | The Rising MeghalayaOctober 11, 2022

Ia ka met kaba sah u samla kiew lum ka jylla ba dei artad u dkhot ka Meghalaya Sports Climbing and Mountaineering Association (MeSCMA), uba la khlad noh ryngkat bad kiwei pat ki nongkiew lum lem bad ki nonghikai (instructor) ha u kliar jong u lum Draupadi Ka Danda II ba don ha Uttarkashi, ka jylla Uttarakhand, la on tep don burom noh ia ka mynta ka sngi ba ar ha u lum jingtep ka Balang Presbyterian Lumparing bad iaka jingiaseng ontep la pyniaid ia ka da Rev. P Marbaniang.

Kumban shu pynkynmaw ba ka met jong u bah Tiklu, la ioh ban sei ia ka da ka kynhun ki shipai, ka ITBF, Search & Rescue Team ha ka 8 tarik jong ka taiew kaba la dep, hadien ba kane ka kynhun, ha ka step jong ka 4 tarik, katba ki dang don ha lynti ban kiew pyndep ia une u lum, shu san kynsan ka suin bneng ka la sdang ba kan kem sniew, ha kaba u lyoh iong ba rben u la wan ban tap lup bad u thah uba don ha une u lum u la twa tad haduh ba un da btep im ia baroh 27 ngut bad kiba dang jah bad ba khlem pat ioh ban sei ia ka met ka jong ki na une u lum ki long sa ar ngut.

Shwa ban sdang ia ka jingiaseng ban leit on tep, ki samla kiew lum ka jylla ki la wan shakhmat ban tap don burom da ka lama ka synjuk halor ka synduk jong u bah Tiklu, kum ka dak ban ai burom khatduh  ia une u samla Rangbah, uba thrang ka mynsiem ban paw ha kane ka jait kam.

Hadien kane, la ioh pat ia ka jingkren na ka liang ka ïing ia kaba la ioh ia ka jingkren na u kñi jong bah Tiklu ha kaba u la iathuh ba la kha ia u Tiklu ha u Jylliew jong u snem 1988 katta uba la don mynta 34 snem ka rta bad u long u khynnah uba la smat ban pule ia kaba u la lah ruh ban pyndep ia kumba kato katne, hynrei udon ruh ia ka sap ban dro ia ki dur, hynrei ka kam kaba kylla long ka thong bah ha ka jingim kaba u Tiklu u la kwah eh ba un paw dei ha ka kam ban kiew ia ki lum, kaba haduh ha ka khyllipmat kaba ula don bad ka kynhun ban kiew ia une u lum, une u samla Rangbah, u la pynpaw ia ka jinglong ba smat ba shemphang ba dba proh jabieng napdeng kiwei pat ki samla, tad haduh ba ki bor pyniaid ka Nehru Mountaineering Institute ki pynpaw ba udei uwei na ki nongshah hikai (trainee) uba da kynsai tam napdeng jong baroh.

Na ka liang u bah Wallambok, General Secretary ka MeSCMA bad ha ka juh ka por ba dei u kynum trai u Tiklu, u pynpaw ia ka jingsngewnguh ia baroh kiba la kloi ban ia wan shakhmat ban ia kit ia bah ba dban tynrong lem ia ki kam ki jam, naduh ka khyllipmat ba kum ka iing ka io9h pdiang ia ka khubor jong kane ka jingjia ba dban sngewlem ia ka iing ka sem.

Hadien kane na ka liang ka Balang Presbyterian Lumparing  ki la shimti ha kaban pyndep ia ka service hapoh ka iing ba  rah pat sha u lum jingtep ha kaban ontep don burom.