La thaw iaka seng ban pynneh pynsah ia ka ktien bad kolshor ki nong Jaintia

Syllad | The Rising MeghalayaJuly 28, 2024

Ki riew donsap ha ki kam shna phlim, ka tem ka put bad kiwei pat ki la lah ban thaw ia ka Seng All Jaiñtia Film, Music & Art’s Association (AJFM&AA) da ka jingthmu ban kyntiew ia ki sap ki phong bad ia ka kolshor jong ki nong Jaintia lyngba ki kam phlim, ka tem ka put, ka rwai ka siaw bad kiwei pat i sap ki phong.

Ka thong ba kongsan jong ka Seng ka long ruh ban pynneh pynsah kyrpang ia ka ktien ka thylliej bad ia ka kolshor jong ki nong Jaintia lyngba ki phlim bad ki jingrwai na ka bynta ka pateng ka ban wan.

Ki nongialam jong kane ka seng ki kynthup ia u Arwotki Sumer kum u President, Hamran Shylla Vice President, Ebormi Muksor General Secretary, Joint Secretary Daoo hi paia Toi bad E Manbha Kynjiñ, Publicity Secretary Careme Phawa, Marboon Laloo  Finance Secretary. Katba ki dkhot ka Editorial Board ki kynthup ia u Erick Lamare, Sunday Salahe, bad u Dauru Laoo kynthup ia 15 ngut ki executive member ki ban kyrshan ia ki jingtreikam jong ka Seng.

Na ka liang u Bah Careme Phawa ha ka jingkren u la ban jur ia ka jingdonkam jong kane ka phang bad ka jingaiti ban kyntiew bad pynroi ia ka imlang sahlang jong ki nongshna phlim, nongtem nongput bad kiwei pat.

Ka Seng ka don ruh ia ka jingthmu ban pynlong ia ki rynsan bapher bapher ban plielad ia ki nongtem nongrwai trai shnong ba kin lah ban pynpaw ia la ki jong ki sap ki phong bad ka ban noh synniang shibun sha ka kolshor jong ki nongshong shnong ka Rilum Jaintia.