La treikam ka Maternal & Child Health Hospital Jowai duna ki nurse bad doktor pynkha iwei khunlung

Syllad | The Rising MeghalayaMay 28, 2023

Ha kiwei kiwei ki jaka haba pyntreikam ia kano kano ka skim ka ju don ka sngi buh mawnongrim bad ka sngi plie ne ka inauguration hynrei ha Ri Lum Jaintia ka don kawei ka skim kaba kyrpang haduh katta katta namar ka don haduh lai tylli ki sngi kyrpang kata ka sngi buh mawnongrim, ka sngi plie paidbah bad ka sngi pyntreikam ne ka operational.

Kane ka skim kaba kyrpang ka dei ka Maternal Child Health Hospital kaba don ha shnong Panaliar, Jowai ia kaba la plie paidbah ne ladep plie ha 3 tarik Nohprah 2022 da u Conrad K Sangma.

Hynrei kam shym la treikam wat hadien 168 sngi bala dep plie paidbah namar ba ym pat la ban pyntreikam namar ba ym pat shym ladep ban thung ki doktor ki nurse katkum ki tyllong khubor kiba thikna.

Ha ka sngi Saitjain ne kata 27 tarik une u bnai Jymmang, la pyntreikam noh ne la operationalized ia katei Maternal & Child Health Hospital, Jowai.

Haba ïakren bad u Medical Superintendent MCH Hospital u Dr. E War ula ïathuh ha katei ka hospital ka don 50 jingthiah na bynta ki khynnah bad 50 jingthiah na bynta ki longkmie.

Ula iathuh ba katkum ka jingmang jong ka Sorkar ladep thung 11 ngut ki doktor Medical & Health officers bad saw ngut ki specialists kata arngut na bynta ki khyllung ne ki paedetrician bad ar ngut kiwei pat na bynta ki kynthei ne longkmie ne obestrician bad gynaelogist. Ula iathuh ruh ba ladep thung 33 ngut ki nurse watla kam pat biang satia.

Ha ka sngi bala sdang pyntreikam la pynrung hynriew ngut ki patient ki nongpang bad ha katei ka sngi la don ruh iwei i longkmie iba la kha ia iwei i khyllung shynrang.

Ka khubor ka iathuh la mang ban buh 27 ngut ki medical & health officers ha Maternal Child Health Hospital Jowai ha ki bnai Kyllalyngkot bad Rymphang mynta u snem, hynrei 10 ngut na ki la hap buh noh ha ki PHC ne CHC namar ka jingleit training sha Chennai. Na ki 17 ngut ki doktor kiba dang sah na ka 27 la don sa hynriew ngut kiba leit pule pyntbit ne leit pule shuh bad kumta dang sah sa 11 ngut ki doktor kiban trei mynta ha kane ka hospital.

Kan dang shim por shuh shuh shwa ba OPD jong katei ka hospital kan treikam pura.