La wan poi lut ki diengkhlam, lashai yn pynkut iaka Behdieñkhlam ka raij Mukhla

Syllad | The Rising MeghalayaAugust 19, 2021

Ka jingleh Niam ia ka shad Behdeinkhlam ka Seiñraij Mukhla kala poi sha ka sngi kaba lai haka sngi Palei bad yn pynkut iaka lashai ka sngi 20 tarik ha ka aitnar ka Seiñraij Mukhla, Mukhla Nongrim ha ka por 2:00 pm.

Mynta ka sngi kaba dei ka sngi balai ka jinglehniam la wanrah ia u dienkhlam na ka shnong Mukhla Umlangshor kaba long ka shong bri, bad ia une u diengkhlam la buh ia u ha madan Slot Masi.

Ki rangbah ka Seiñraij Mukhla hapoh ka jingialam u Langdoh bad ki waheh Sankur ki la leit sha Madan Tih Khyndaw ban leit pynieng nyngkong ia u diengkhlam uba long ruh u Khnong Blai, bad hadien la pynieng sa ia u diengkhlam ka Mukhla Nongrim ha Madan Slot Masi bad bud pat sa u diengkhlam uba wanrah na ka shnong Mukhla Umlangshor.

Hadien ba la dep ban pynieng ia kine ki 3 tylli ki diengkhlam, la pynlong biang ia ka Dorbar Niam bad la pyniaid ia ka da u Langdoh bad ha ryngkat ki Waheh Sankur ban ia kren ia pynbeit ia ki kam ki jam na ka bynta ka Behdeinkhlam ha ka sngi Muchai kaba dei ruh ka sngi pynkut ia kane ka jinglehniam Behdieñkhlam.