La weng iaki speed breaker bad yn pynkylla iaka rukom iaid kali ha sor Jowai

Syllad | The Rising MeghalayaOctober 6, 2022

Ka bor synshar district jong ka West Jaintia Hills District ban pynjem iaka jingiaid suki ki kali kaba la wanrah iaka jingdheng kali da kaba weng iaki katto katne ki speed breaker haki lai tylli ki jaka bad buh thymmai ruh ha kawei pat ka jaka haka sngi Palei.

Nalor ka jingweng iaki speed breaker, kiba la pynthud shaba palat iaka iaid ka ieng ki kali ka bor synshar district kan pynkylla ruh iaka rukom iaid kali ha Jowai ha ki katto katne ki lad ban pynkylluid iaki surok bah ha Jowai.

Kane ka jingweng iaki speed breaker ka long hadien ba ki synjuk ki nongniah kali kamai taksi hapoh ka lama jong ka West Jaiñtia Hills Taxi Owners Drivers Association (WJHTODA) Jowai kila ujor sha u Deputy Commissioner West Jaintia Hills District Bah BS Sohliya ba ka jingbun palat ki speed breaker hapoh ka sor Jowai naduh New Hill haduh Mihmyntdu kala wanrah iaka dheng kali bad kala ktah iaka kamai kajih jong ki.

Kumta u DC ula phah jurip ia kane jingdeng kali hynne ka sngi haka jingiadonlang u executive magistrate, Superintendent of Police, ki engineer PWD bad ka tnad Transports nalor kiwei kiwei.

Ha kane ka jingjurip, u DC ula ong ba katkum ka kaiphod kaba la ioh ka long ban weng noh iaki speed breaker ha Mooralong (ne ka lad sha ka skul Jowai Public School), Mookyndur, Iawthymme (Ladthadlaboh) bad ha Thluwania ne ha Lad ban leit sha ka skul Jaintia Higher Secondary School.

Ha ka jaka u speed breaker ha Iawtymmai la pynkynriah noh ha khmat ka iew thymme ne lad Stadium ban pynsuki iaki kali kiba mih na iew. Katba ha Ladthalaboh hakhmat ka madan skul yn pynjem ia u speed breaker.

Shuh shuh  Bah Sohliya ula ong ba ka report kala ai jingmut ruh ban ailad noh ban iaid ki kali arliang ka surok (Two Lane) ban rung ban mih na ka surok ban rung sha Thomas Jones sha Dulong College Road ne Dr Norman Tunnel Hospital.

Nalor katta ban buh ruh iaka jaka ieng kali ki kali shimet ne private ha lad Thomas Jones.