Lada ha kum kane ka por ka UDP kam poi sha ka thong la hap ban shu ong bye bye UDP: Bindo

Syllad | The Rising MeghalayaMarch 2, 2022

U Bah Bindo M Lanong ba dei artad u chief adviser ka seng United Democratic Party (UDP), u bynniaw haba u shem bad iohi ia ka jingiapait bad ia pra jong ki khun samla, ha kaba iadei bad ka kam sain hima sima ha ka jylla.

Haba iakren bad u nongthoh khubor, u bah Bindo u lap bad shem ba kumba ka long ia mynta don ki samla ba don sha ka seng jong ka NPP, HSPDP ka bym don shuh ruh ki leit ban ia boi, don kiba leit sha ka PDF bad kumta ter ter, kaba mut ba ki samla ki la sakma, ki la leit la ka jong ka jong ka lynti.

Ha kane ka jingiasakma jong ki samla, kaban mih nangta  ruh kan long ka dak jong ka jingsakma, ym don shuh kawei ka seng kaban ioh ia ki MLA kiban lah ban thaw sorkar tang da kawei ka seng.

Kumta haba shem bad iohi ia kane, u bah Bindo u ong ba kane ka jingiasynrop kaban iai neh lynter, hynrei u la ong pat ba ha ka por kaba kum kane, kaba ka seng Congress kaba la synshar sanphew snem ka la pra pom, kane kein ka dei ka por ba kum ka seng trai ri kaba heh tam dei ban ioh ma ki kein.

Dei haba shem bad iohi ia kane, ba na ka liang ubah  Bindo ha ka jingkren ka jong u kaba dang shen sha ki samla jong ka party, u kyntu ia kiban shim ia kane kum ka thong bah ha ka jingim ban leit ban pynsngewthuh sha ki para samla khnang ba kin ia wanlang ha ka juh ka nongrim.

U Bah Bindo u la ieng ban pynkynmaw ba ha ka por ka ia kaba kum kane, haba ka Congress bad kiwei kiwei ki la pra pom bad klumar, lada ka UDP kam lah ban poi sha ka thong, la hap ban shu ong bye bye UDP, pynban kum u nongaibuit ia ka party, u bah Bindo u khlem pynduh mynsiem, hynrei u kyntu ba ki samla ki donkam ban shim ia kane ka mat kum ka thong jingialeh ban pynbeit ia kiei kiei bad lada ym lah ban pynbeit da lei lei yn nym lah ban poi shaei shaei ruh em.