Lada ioh um ioh ticket UDP nga la rai ban iakhun iaka elekshon MLA: Shemhok Garod

Syllad | The Rising MeghalayaOctober 14, 2022

U Ma Shemhok Garod ula pynbna paidbah haka sngi Thohdieng ba un iaid shakhmat ban aireng iaka MLA elekshon 2023 na ka Raliang Constituency.

Haba kren bad ki nongthoh khubor, u Ma Garod uba long ruh u MDC barim ka Nangbah ula ong ba u ap khmih lynti iaka ticket United Democratic Party (UDP), hynrei namar ba ka UDP haduh mynta ka sngi kam pat lah rai, kumta ula rai ban iakhun beit iaka elekshon bad iaka ticket un peit hadien.

Kane ka thain ka don ar ngut kiba pan ticket na ka UDP, kynthup ia u MDC ka Shangpung u ma J Treilang Suchiang.

“Ka daw ba nga rai ban iakhun iaka elekshon ka dei ba kiba bun ki nongkyrshan jong nga kila pynshlur ban iaid shakhmat hadien ba ka 3 Raliang Constituency kala shah iehbein shaba palat bad duna kia kam pynroi,” la ong u ma Garod, uba long ruh u secretary Raliang Constituency UDP Circle.

Ula ïathuh ba haki saw san bnai ka jingpynkhreh jong u sha ka Eleshon MLA-2023, ula ïoh lad ban leit sha man ki shnong ki thaw bad man ki thliew ïing jong ki nongshong shnong ka 3-Raliang Constituency bad haka jingïasyllok bad ki nongshong shnong ki ai ka jingkyrshan kaba pura ïa u.

Ula ïathuh ba kum u MDC barim jong ka Nangbah Constituency ula wanrah shibun ka roi ka par hynrei haba ïanujor ha kine ki saw snem kiba ka dep hapoh ka MDC Nangbah Constituency ym don kano kano ka roi ka par.

Shuh shuh ula ong, hapoh ka 3- Raliang Constituency ki paidbah ki shem jingeh haka leit ka wan namar ba ki nongmihkhmat mynta kila lehklet ban pynbiang iaka jingdonkam u paidbah.

Ula ther ruh iaka sorkar MDA ha ka jingïalam jong ka NPP kala wanrah iaka jingiapher ïaki nongshong shnong jong ka Jylla kaba la mih ka sur na u paidbah ha ka khaii ka pateng bad u luk u lak ula iap thngan hadien ba mih kita ki kynhun High Level bad ki Low Level bad kane ka long ka bym lah ban pdiang satia haka synshar paidbah bad haka imlang sahlang.

Ula kynthoh ruh iaka sorkar MDA kaba ialam ka NPP bad UDP halor ka jingiakhih ki nonghikai da kaba thiah miet ha surok watla ula tip tyngkreiñ ba ïaka tnat pule puthi la khmih da u MLA ka UDP hi u Ma Lahkmen Rymbui.

Ula pynpaw ruh iaka jingsngew lyngngoh halor ka jingthung nongpeit pyrman ka UDP hapoh ka constituency ban rai iaka ticket. Ula kynthoh ba kim iohi ia kine ki nongpeit pyrman haduh mynta ba kin wan kylli bniah shaki shnong ki thaw hapoh ka constituency bad ula ong ba lehse ki shuh kylli tang haki phone.

Ula kyntu iaka Election Committee ka UDP ba ki dei ban wan tohkit bniah hi shaki shnong ki thaw khnang ban ïoh ka report kaba shai.

Haba ïadei bad ka jingkynnoh kynthoh kiba bun balang ïa u, ba dei u kadidate bala pynïeng da mano re mano, ula pynshai ba ka jingkynnoh kadei kaba khlem nongrim bad kidei tang ki jingpynwit pynthut na ka bynta ka jingpynkhreh jong u shaka election MLA 2023.

Ula kyrpad ïaki paidbah ka 3 Raliang ba kin ailad bad kyrshan ïa kane ka jingkwah bad jingangnud jong u.