Lada ka ECC ka shim iaka aiñ ha kti, ngi ruh ngim banse ong ki trai Coke Factory ha Elaka Sutnga

Syllad | The Rising MeghalayaOctober 16, 2021

Ngi kum ki trai jong ki Coke factory kiba don hapoh ka Elaka Sutnga ngi kwah ban pynshai paidbah halor ka jingkynnoh jong ka Environment Coordination Committee (ECC) halor ka jingshna iaki Coke Factory ha Elaka Sutnga.

Nyngkong haba ngi thmu ban buh ia kine ki factory ngi la dep iakren bad pynbeit shwa ia ki jaka ban buh, hynrei hadien ba ngi la poi sha ka jingia sngewthuh jingmut, kata na ka liang ki shnong u Rangbah Shnong bad u Secretary Shnong ryngkat ka jingaibor ki Dorbar shnong, u Dolloi ka Elaka Sutnga, u Secretary ka Elaka kila ia mynjur lang da ka mon sngewbha kata ruh ha dien ba ki la leit ban peit lang ia ki jaka (Join Inspection) ki la rai bad kila ai sha ngi ia ki kot ki sla ba donkam kata ia ka N.O.C ha ka jingiadei bad ki factory, bad nalor kata ki don ruh kumba ar ne lai tylli ki shnong kiba la support ban ai N.O.C wat tang ia kawei ka factory te kumno ki kynnoh pynban ia ngi, kata ruh khamtam kum ka Shnong Latyrke, Shnong Moolamylliang bad kiwei kiwei, kumta halor kitei ki jing kynnoh jong ka ECC ba ka jing buh ia kitei ki Coke Factory ha ki tei ki jaka ki long kiba beain ki long kiba bakla bad ki bym don nongrim.

Nalor kata ngi kwah ban pynshai paidbah ba kane ka jingpyrshah jong ka ECC ia ki Coke Factory ki ong ba ia ki N.O.C ruh la ai tang da ka jingtip jong ki katto katne ngut ki riew rangbah ne nong shongshnong, hynrei ka jingshisha kam dei kumta,kine baroh ki jing ong ki long kibym don nongrim. Ia ngi la dep ailad ban shna Coke factory dei da ka jingiamonlang ki nong shongshnong hi, bad ka jingai N.O.C jong u Dolloi badon burom jong ka Elaka Sutnga u (L) E Sutnga bad u Secretary ka Elaka Sutnga M Sutnga ruh kam dei ka jingleh jong ki tang arngut, hynrei ka jing ai jong ki ia ki N.O.C sha kine ki trai factory ka dei hadien ba la ioh ia ka jingmynjur lang da baroh ki khun jong ka Elaka Sutnga hi.

Ngi kur ki trai Coke factory ruh ngi sngewsih jur halor kane ka jingkynnoh bym don nongrim khlem da tip ia ka jingshisha, ka jingshisha hi ia kine ki kot ki sla bala dep ai sha ngi kim dei kiba dang mynta mynne, hynrei ki dei kiba la pyllait N.O.C da ki phew phew snem ba ladep, nalor kata kala don ruh kawei ka Coke Factory kaba don hapoh ka thain Umtyra, East Jaintia Hills District, Khliehriat, kaba kyrteng ka “Ka Jaintia Coke Factory” kaba la ai N.O.C naduh ka por u Acting Dolloi Sutnga barim jong ka Elaka Sutnga ka iaid beit iaid ryntih, kar don ka jinghuri hura naduh ki tei ki por haduh mynta. Kata ruh naduh u snem 2004, ka dei kaba la rim tam hapoh Jaintia, nalor kata ia ki N.O.C ruh la ai hapoh ka Elaka Sutnga ha kine snem 2008, 2018, 2019, 2020, 2021.

Kumta ma ngi ki trai kharkhana haba ngi seng ne buh ia kino kino kharkhana ruh ngim lah ban buh beain khlem da ich jingbit ne ki kot ki sla babiang kiba hap hapoh u pud u sam jong ki shnong ba marjan lane ki N.O.C babiang. Nalor ngi hap ruh ban bud ia ki kyndon ka ain ba ka sorkar ka la buh, hynrei nalor kine ngi kwah ban pynshai shuh shuh ba kaba phylla ka long ba ki don katto Katne ngut ki dei ki dkhot jong ka ECC ki dei ki EC members jong ka Elaka Sutnga, bad ki dei maki kiba mynjur (Support) ban ai N.O.C la ngi, hynrei kine ki juh kiba pyrshah haduh kane ka khyllipmat.

Te lada ki sngewthuh ba ka don ka jingktah na kine ki Coke Factory ka jingkylli ka mih balei pat ki ai N.O.C ia ngi. Imat ka don kaei kaei ka daw na sha lyndet. Kumta ngi kwah ban pynshai lut khnang ba phin sngewthuh paidbah ba hadien ba ngi la ioh ki kot ki sla na ki shnong jong kito jaka, ki kot ki sla na ki Elaka, na Jaintia Hills Autonomous District Council Jowai, ki clearance Certificate na ka Tnat Forest, bad kiwei kiwei de. Kumjuh ruh kumba ngi la iohi ha ki khubor paidbah (Social Media) ha ka 9 tarik October 2021, ki don ruh kumba katto katne ngut ki dkhot kiba la sdang ban ia kren shongshit bad kren klumar ia ka bym iadei satia kat kum kane ka juk shai bad ha ka juh ka por ki juh ki member jong ka ECC ki la byrngem ruh ba lada ka sorkar kam leh ei ei halor kane ka jingdawa jong ki, ki la rai ban leit pynpra hi ia baroh 34 Tylli ki Coke Factory kiba don sha ki tei ki thain.

Hynrei ngi kum ki trai Coke Factory, ngi pynshai paidbah da kaba shai kdar bala da ka ECC ka pyni da ka bor khlem da kohnguh ne ia trei lang bad ki bor Sorkar ban bud ryntih ia ki riti synshar jong ka Ri India bad ban shim ia ka ain hala ki jong ki kti, ngi ruh ngim banse ban iaid da ka wei pat ka lynti bad ban ai ia ki sha ki bor jong ka ain da kaba tyngeh ia uno uno ne kano kano ka nong pynkhein aiñ.

Na U Forgive Dkhar
Uwei na ki trai Coke Factory.