Lada ka MDA kam lah ban pyniaid ia ka Sorkar ailad ia ka VPP kan shimti: Ardent

Syllad | The Rising MeghalayaJune 8, 2024

U President ka Voice of the People Party (VPP) u Bah Ardent Miller Basaiawmoit u la ong ba lada ka Sorkar Meghalaya Democratic Alliance (MDA) ba la ialam da ka NPP kam lah ban pyniaid ia ka sorkar ka dei ban ailad ia ka VPP ba kan shimti ban synshar ia ka Jylla.

U la ong ruh “Ki don ki Myntri Sorkar kiba la pynpaw ba mynta ka dei ka kamram jong u MP bad ka VPP ba kin kren ia ki mat kiba iadei bad u paidbah hapoh Parliament, hynrei nga sngew dei ba ki dei ban ong ba ka VPP ka dei ban shimti ban pyniaid ia ka Sorkar Jylla kan kham bha shibun namar lada phi sngew ba phim lah ban pyniaid ia ka Sorkar, shah ia ngi ba ngin pyniaid ia ka Jylla.”

Ia kane u Bah Ardent ula pynpaw haba kren ha ka rally ha Smit kaba long haka 8 tarik Jylliew ban ai khublei ia ki paidbah ka Rilum Khasi Jaintia kiba la ai ka jingkyrshan kaba shitrhem ia u  kyrtong ka VPP u Dr Ricky AJ Syngkon uba la ioh ia ka jingjop kaba don burom ha kane ka Lok Sabha ilekshon kaba dang shu dep.

U kyrtong ka VPP u Dr Ricky AJ Syngkon ula lah ban pynliem noh ia u MP ba lai samoi jong ka Seng Congress u Bah Vincent H Pala da kaba tam haduh  palat 3.7 lak vote, kata kaba dei ruh ka jingtam kaba heh duh ha ka histori ka Jylla.

Na ka liang u Bah Ardent u la kynnoh ruh ia ka sorkar MDA halor ka jingsyier ban pynlong ia ka ilekshon MDC da kaba pynjlan ia ka samoi treikam jong ka KHADC bad JHADC da haduh hynriew bnai.

 “Hadien ka ilekshon MLA, ha ka jingshisha la dei ban pynlong noh sa ia ka ilekshon MDC, hynrei namar ka jingsyier ia ka jingkyrshan shitrhem jong ki paidbah kiba kyrshan VPP, kumta ki la pynjlan ia ka samoi treikam jong baroh ki artylli ki ADC. Ki la ong ba ngin iakhun shwa ia ka ilekshon MP namar ki sngew thikna ba ka VPP kan shah rem bad ba ka lyer kan kynjah noh, hynrei kaba la kylla long pynban markhongpong ha kaba ka VPP ka la jop kput syndon,” ong u nongialam ka VPP.

Nalor kata une u nongialam ka VPP ula ong ruh ba ka don ka jingartatien ba ka Sorkar MDA kan pynlong ia ka ilekshon MDC namar ki dang bunkam ban pynjai jai ia ka lyer jong ka VPP khnang ba kan ym ktah ia ki ha ka ilekshon MLA 2028 ha ka Jylla. Ha kajuh ka por u la kyntait ba ka VPP kala kular ban pynioh kam Sorkar ia ki paidbah.

 “Ngim pat ju kular satia ban pynioh kam sorkar. Ngi khlem kular hi ruh ia ki paidbah ban ai kam sorkar, hynrei ngi shu kyrpad ia ki ba kin ai ka jingkyrshan bad ban vote ia u MP jong ngi khnang ba un lah ban leit sha Parliament ban iakren bad ka Sorkar Pdeng halor ki ishu bapher bapher ba ktah ia u paidbah” ula ong.

Shuh shuh u la ong ruh ba ki paidbah mynta ki la kham stad shuh shuh. Ki kwah ban thied ia ka mar kaba ki lah ban shaniah. Kumta ruh ka VPP ka la ioh ia kata ka jingshaniah jong u paidbah bad kaba shem shitom ban ialam bakla ia ki.