Lada Nga jop, ka dei ka jingjop u kup shilliang sem shilliang: Rikut

Syllad | The Rising MeghalayaFebruary 5, 2025

U Ma Rikut N Parien u kyrtong ka Congress na 13-Saphai Sahsniang haba pan jingkyrshan na ki paidbah ka Constituency ula ong, “Nga wan na ka longiing baduk, Lada Nga jop ka dei ka jingjop jong ki kup shilliang sem shilliang, ki nongrep bad nongbylla sngi.”

Haba iadei bad ki ain hapoh District Council, u Ma Rikut N. Parien ula ong kumba long mynta ki ain ki long kiba tlot khamtam haba iadei ki jaka puta bad kala dei ka por ban pynthymmai noh katkum ka jingiaid ka juk ka por.

Ban weng iaka jingeh jong ki paidbah haba iadei bad ka jingslem haba ialeh iaki kot jaka kum ki Land Holding Certificate bad kot patta, ula ong ba donkam ban pynthymmai noh da kaba pyndonkam iaka Internet bad kor Computer ne ban leh Digitalization noh iaka rukom treikam da kaba pyndap iaki kot jaka bad siew pisa da kaba leh online lyngba ki Common Service Centre kiba don haki shnong.

Nalor kata ula ong ruh ba donkam ban pynkhlain bad aibor iaki dorbar Elaka bad dorbar shnong khnang ban iada bad pynneh iaka jaitbynriew ba kyrpang.

Ula ong ruh ba ka district council ka don iaka tnad Market kumta donkam ban pynkhlain iaka khnang ban ba ki samla kin ioh kam ioh jam kumjuh ruh ban thaw iaki iew dielang ne Wholesale Market khnang ban lait ki briew kiba nabar ka jylla ban pynjem dor iaki mar ba pynmih ki nongrep kum u synsar, shynrai bad sying.

Haba iadei bad ki jaka pawnam kum haka thain Saphai bad Iooksi ba don ka wah Kupli bad ka thain Sahsniang ba don ka wah Myntang yn thaw iaka tnad tourism khnang ba ki samla kin lah ban seng kam seng jam kum ki Home stay bad nongbtin lynti ne Tour Guide.