“Lada nga jop u Modi un ong ia nga Beta Aa Jao,” ong u Bah Sanbor

Syllad | The Rising MeghalayaApril 4, 2019

MOWKAIAW: U Bah Sanbor Shullai Kyrtong MP jong ka Bharatiya Janata Party (BJP) u la ong ba lada u jop ia ka elekshon MP u Narendra Modi uba la thikna ban wanphai kum u Prime Minister ka Ri un sa pdiang ia u kum u khun “Beta Aa Joa” bad theh kyrkhai ki jingkyrkhu ha ka jylla lyngba ki kam pynroi pynpar.

U la iathuh ia ki paidbah ba u dei u Pnar bad  ïing kmie jong u ka dei ha Loomkyrwiang Jowai, hynrei la kha la pynheh ia u ha Shillong bad u sngew sarong ba wat la u dei u Pnar u la jop ia ka MDC la san sien bad ia ka MLA la lai sien na ka Laban constituency ne Shillong South.

U Bah Sanbor haba kren haka jingialang ban pan jingkyrshan na u paidbh ha iew Mowkaiaw ula ong ba ha ka por elekshon MLA mynshem snem ka party ka la kular ban pyllait ia ka jingkhang tih dewiong hapoh hynriew bnai ,hynrei ki khlem wan ha ka bor namar la jop tang arngut ki Pnar kata ma u na Shillong South bad u Bah Alexander Hek Laloo na Pynthorumkhrah. 

U la iathuh ba ki paidbah jong ka Nagaland kiba long haduh 98 na 100 ki Khristan ki la ai jingiakyrshan tylli ha ka party BJP ha ka elekshon MLA bad ka BJP ka la jop bad ka la thaw sorkar bad tang hapoh shi taiew u Modi u la pyllait 2600 klur sha ka Nagaland na ka bynta ka kam pynroi pynman bad ka sorkar jylla ha Nagaland ka la thaw 2.50 lak ki kam sorkar .

U MLA jong ka Shillong South u la iathuh ba ka katkum ka jingtip bala ioh lum da ma u na ki heh sorkar donkam haduh 4 lak tylli ki kam sorkar ha Jylla Meghalaya na bynta ki khun samla bym donkam donjam bad na kitei haduh 70000 tylli dei ha ka tnad Traffic jong ka police department.

U Kyrtong jong ka BJP u la kob ba ka sorkar BJP kan sa thaw sorkar biang ha Ri India te kumta kan bha ia ki paidbah ban jied ia u kum u MP namar u la dei lypa ha ka party ban synshar bad lada u jop kum u MP ki ishu jingkhang tih dewiong ki ishu jingiakajia khappud ha Block-I & II bad kiwei kiwei de ki jingeh jong ki paidbah yn weng shisyndon.

Kiwei kiwei kiba kren ki kynthup ïa u President BJP Meghalaya Ma Shibun Lyngdoh, President jong BJP Mahila Meghalaya ka Kong Anita Susngi.