Lada ngi stad katno katno ngim lah ban ialeh bad ka mariang ong u Chief Justice

Syllad | The Rising MeghalayaApril 25, 2022

U Chief Justice jong ka High Court Meghalaya Sanjib Banerjee ula ong “Lada ngi stad katno katno ngim lah ban ialeh bad ka mariang, kumta ka donkam ia ngi baroh lang ban tyngkai iaka jingbuh jingsad ka mariang kynthup ia ki syntiew ki skud, ki dieng ki siej bad ki mrad mreng.”

U Chief Justice Sanjib Banerjee haba kren shuh shuh kum u kongsan haka Chad Sukra Festival jong ka Seinraij Jowai ha Iawmusiang haka Sngi U Blei ula ong ngi dei burom bad niewkor iaka riti ka dustur. Ka jingnang jingstad, ka roi ka par bad ka stad saian kim dei ban long ki daw ban duh dam ka riti ka dustur bad ka jingithuh, hynrei ban pynkhlain bad pynjanai shuh shuh.

Ka Chad Sukra ka dei ka jingaikhublei iaka aiom pynrem shuwa ban bet ia u symbai u phiang bad dap ban biang u thiar.

Ula ong shuh shuh ba ngi dei ban long ki nongsain dur bad tyngkai bad ai jaka lem ia baroh ki lai phew jingthaw naka bynta ban ioh bhah lang ka pateng ban wan.

Ula ong ba kane ka jylla ka dei kaba la kyrkhu da ka spah mariang bad ha manla u iaid lynti u iap biej iaka jingitynnad ka sawdong sawkun ka mariang.  

Shuwa kane kala don ka prokram ha Mynkoi Pyrdi, Loompyrdi Iongpiah ha kaba u Ma Kyrmen Shylla myntri sorkar ula long u kongsan haka jingiadonlang u MLA Jowai Ma Wailadmiki Shylla, Dolloi Elaka Jowai, u u Ma Puramon Kynjing, Dolloi Elaka Shangpung u Ma Chanki Langbang, Dolloi Elaka Nangbah u Ma RM Garod nalor kiwei kiwei.

Ha kane ka kynti u Dolloi Elaka Jowai ula pyllait paidbah ruh iaka kot Niamtre-kaba shon haka sien kaba ar.

Ka phang pdeng jong ka Chad Sukra une u snem ka long “Samoi wa kylla wa pynchoh ïei por, Ïeiwa ïoh u tip u ñiawkor”.

Hadien ka prokam ha Iongpiah la hiar ha Biar ka Blai, Pohskur pynbud sa ka iaid surok paidbah haduh Iawmusiang.

Iaka jingialang ha Iawmusiang la pyniaid da u ma OR Shallam president Seinraij bad la pynshongshit shuh ia kane ka Chad Sukra mynta da ka jingwan ki Seng Khasi Mawlai, Seinraij Shillong kynthup ki dong ki shnong ha Jowai.

Katba ha ka por mynmiet kaba dei ka bynta kaba khatduh jong ka shad Sukra kala don ka jingshad pynwiar ngiah ha Mynkoi Pyrdi Loompyrdi Ïongpiah.