Lah ban neh kham slem ka drama politik ha JHADC

Syllad | The Rising MeghalayaSeptember 2, 2019

JOWAI: Ka Drama kyntiap seng jong ki MDC ha Jaiñtia Hills Autonomous District Council (JHADC) ka lah ban neh kham slem namar ba hadien bala mih khubor ba pynïasoh BJP ki 8 ngut ki MDC kala theh umpjah ia baroh ki plan bad kala pynkhih khohreh ïaki ar tylli ki seng sain hima sima ka UDP bad NPP ban pynlang pynlum iaki MDC jong ki.

Ka jingsaphriang kloi ka khubor ban pynïasoh BJP ki 8 MDC kaba ka jingïakren kala neh ar bnai lai bnai eiei, hynrei shi khlak kala pynpulom ïaka jingthmu kyntiap seng jong kiwei pat ki MDC ki bym pat paw kyrteng.

Ka UDP kala sdang ban khroh ïaki 4 MDC jong ka kiba la thmu ban phet seng bad kala khot jingialang haka 4 tarik une u bnai ha sor Shillong ban iakren halor kane ka mat.

Katba ki MDC ki NPP kiba jop haduh 12 ngut ha JHADC kila lum jingïalang ban ïakren halor kane ka kam kyntiap seng.

U Nongaiktien jong ki MDC ka National People’s Party (NPP) u Ma Phasmon Dkhar ula kam ba baroh 12 ngut ki MDC jong ka NPP ki dang long kawei ha ryngkat ka jingkyrshan ki 3 ngut MDC shimet bad u MDC shu sieh.

Ula ong ba ba haduh mynta ki MDC UDP ruh ki dang kyrshan ïaka EC kaba ialam u ma Thombor Shiwat bad kim pat ioh kano kano ka jingtip ba thikna halor ka jingthmu kyntiap seng ki 4 ngut ki UDP.