Lah ban pynduh noh ia ki project lynti rel Byrnihat, Shillong; phah pynphai ka Sorkar India ia ka pisa: CM

Syllad | The Rising MeghalayaFebruary 27, 2025

Ka Sorkar Pdeng ka lah ban pynduh pyndam noh ia ki artylli ki project lynti rel, kata ka project Tetelia-Byrnihat kaba 22 km bad ka Byrnihat -Shillong kaba 108 km hadien ki jingpyrshah ba jur na ki kynhun bapher bapher kiba la pynpaw ka jingsngewkhia halor ka jingwan rung kynthep jong ki briew kiba na bar.   

Haba pynpaw ia kane sha ki lad pathai khubor ha ka 26 tarik Rymphang, u Myntri Rangbah ka Jylla u Conrad K Sangma u pyntip ba ka sorkar Jylla ka la shah kyntu ban pynphai noh ia ka pisa kaba la mang haduh T.300 klur na ka bynta ka jingdonkam ban shim jaka na ka bynta kine ki project. 

“Ka jingthmu hi ka long ba ka Sorkar India kam lah ban shu ap sah junom. Ngi la dep ruh ban ioh pdiang ia ka shithi na ka Sorkar India na ka bynta ban pynphai noh ia kane ka pisa ba la thep na ka bynta ka lain Byrnihat bad Shillong.Kumta kine ki project ki lah ban shah pynduh pyndam noh,” u la ong.  

“Ngam tharai ba ka lynti rel kan urlong ha Shillong namar ka Sorkar India ka la phah pynphai pat ia ka pisa bad kaba kham lah ban long lada ka don ka jingkyrshan bad lada ka jubab kaba biang ka wan napoh East Jaintia Hills te ngin lah ban pyniaid shakhmat ia kane ka project sha katei ka thain,” ong u Conrad uba la bynrap, “Ngi dang bishar bniah ruh la ki don ne em kiwei pat ki bynta jong ka thain kiba ngi lah ban pyniasoh lynti rel ha ryngkat ka jingmynjur jong ki paidbah, ngin pyrshang ban iaid shakhmat.”  

U Conrad u pyntip ruh ba ia ka pisa kaba kot haduh kumba T.300 klur hap ban pynphai noh sha ka Sorkar Pdeng bad ong, “Hynrei kaba kham kongsan ka long ba ka jingmang pisa na ka bynta ban shna ia ka lynti rel ha kaba ngi lah ban ioh ia ka GST bad kiwei kiwei ki khajna ka lah ruh ban kot sha ka T.10,000 klur- kata kam dei kaba don bad ngi hynrei bad ka Railway Ministry, hynrei ka pisa kaba wan sha ngi ka dei beit tang na ka bynta ban siew ia ki bai jaka, kata ia kaba ngi hap ban pynphai noh.”

Haba kylli, u Conrad u la ong ba ka jingtyrwa kaba thymmai na ka bynta ban wanrah ia ka lynti rel ka long haduh Khliehriat, East Jaintia Hills, ia kaba ka sorkar ka dang bishar bniah hadien ka jingiakren bad kiba bun ki nongiashim bynta. 

Hynrei, watla katta u la kular da kaba ong, “Ka long kaba suk. Ngin leit lyngba ka jingkyrshan jong ki paidbah ha kaba iadei bad kane ka phang namar ka dei kaei kaei kaba leh na ka bynta ki paidbah bad na ka bynta ka roi ka par ia kaba ngi kyrmen ba ki paidbah kin sngewthuh katba ngi dang iaid shakhmat. Ki lad pyniasoh ki long kiba kongsan haduh katta katta ha kane ka pyrthei kaba mynta. Ngi la pyrshang ban pynsngewthuh sha baroh halor kane. Hooid, ki don katto katne ki kynhun seng kiba ieng ha la ki jong ki nongrim halor kane ka phang bad ngi burom ia kata.”