Lah ban shim por lai snem ban pyndep ka jingpynheh ia ka Shillong Airport; ong u Dy.CM

Syllad | The Rising MeghalayaJanuary 9, 2025

U Symbud Myntri Rangbah uba khmih ia ka Tnad Transport, u Bah Sniawbhalang Dhar u la ong ba ka project ban pynheh ia ka kad liengsuin Shillong Airport ka lah ban shim por kumba lai snem ban lah ban pyndep.

Haba kren sha ki lad pathai khubor ha ka 8 tarik Kyllalyngkot, u Dhar u la ong ba ki Deputy Commissioner ki la iaid shaid shaid na ka bynta ban ithuh ia ki jaka kiba donkam ban shim na ka bynta ban pyntreikam ia kane ka project ban pynheh ia ka kad liengsuin.

“Ngi donkam haduh kumba 22-23 akar ka jaka ban pynheh ia kane ka kad liengsuin, bad ngi la pyrshang ban pyndep ia ka jingpyntrei ia kane ka project hapoh ka lai snem. Kumta to ngin sa ia peit bad kyrmen ia kaba bha tam,” ong u Dhar.

Ha kaba sdang jong u snem ba la dep, ka iingkashari Meghalaya High Court ka la pynmih ia ka hukum kaba bthah ia ka Sorkar Jylla ba kan pyndep ia ka jingaiti ia ki jaka sha ka Airport Authority of India (AAI) ba kan pynheh ia ka Shillong Airport hapoh jong ka lai bnai.

Haba kylli, u Bah Sniawbhalang u la pyntip ba u Myntri ka Tnad Civil Aviation u la ai ka jingmynjur da ka ktien ha ka por ba u la wan sha kane ka Jylla, kumta hadien ba ngi la dep ioh ia ki jaka ngin sa pyniaid shakhmat ia baroh ki kam ki jam kiba donkam.

“Ha ngi hi Nga kwah noh lashai lashai, hynrei haba pynpaw pat ia ka jingshisha ka rukom treikam hi ka dei kaba shim por. Ka jingthied jaka, ka jingpynkhreh ia ka DPR, ka jingmang tyngka, ka jingbhah ia ka kam kine hi baroh kan shim por hapoh lai snem ban lah ban pyndep, hynrei ngin pyrshang katba lah ban pyndep kham kloi namar kan pynmyntoi ia ki briew ki jong ngi hi,” u la ong da kaba bynrap ba kan long ka jingkylla kaba khraw haba ki liengsuiñ kiba heh kin lah ban hiar ha kane ka kad liengsuiñ jong ngi.

Dang shen u Bah Dhar u la ong ba ia ka kam thied jaka yn lah ban pyndep hapoh jong u bnai Lber mynta u snem. Nalor kata u la pyntip ruh ba ka sorkar ka la lah ban pyndep ia ka jingleh sorbe bad la dep ruh ban ithuh ia ki trai jaka.