La pyllait ia ka kot ia ka “Freedom fighters of Meghalaya during British rule” ha Delhi

Syllad | The Rising MeghalayaFebruary 19, 2025

Uwei napdneng ki nongthoh kot ba paw ka jylla, u Bah Daniel Stone Lyngdoh u la pyllait paidbah ia ka kot, “Freedom fighters of Meghalaya during British rule” lane ki “ki nongialeh laitluid ka jylla Meghalaya ha ka por synshar ka sorkar phareng” la pynmih paitbah ha ka 15 tarik Rymphang ha Meghalaya House ha Delhi.

La pyniaid iaka jingialang da ka samla Kelly Khyriem kaba dei ka Ph.D Scholar jong ka Central for Russia bad Central Asian Studies JNU, Delhi. Ha kane ka sngi la ia don ryngkat da u Robin Hibu IPS Officer kum u kongsan ha kane ka sngi uba bat ha ka kyrdan kum u Director General of Police bad uba dei ruh u President jong ka Helping NGO; u Dr Teiborlang T Kharsyntiew kum u symbud Kongsan) uba dei u Assistant Professor jong ka School of International Studies JNU, Delhi; U Amstrong Pame kum u nongshah khot ba kyrpang uba bat kum u Director Ministry of Education, ka sorkar India; kumjuh ha jingdonlang bad kiwei kiwei de ki riewpawkhmat na ki jylla ka North East bad na kiwei de kumjuh na kiwei ki jylla ka ri India.

Ha kane ka sngi ba pyllait ia kane ka kot na ka liang u Robin Hibu kum u kongsan u la kdew ia ka jingdonkam jong kane ka kot ban pynrung ha Syllabus jong ki Skul, ki college jong ki jylla, NCERT bad kane ka kot ka long ba donkam na ka bynta kito kiba kwah ban tip ia ka history jong ka jingialeh pyrshah ia ka rukom synshar donbor ka sorkar phareng, ia ka jingnohsynniang jong kine ki nongialeh laitluid ia ka jylla North East. U la bynrap shuh shuh da kaba ong ba, “Kane ka kot ka long kaba donkam na bynta ki khynnah pule ba ki dei ban tip ia ka mynsiem ka jingaiti bad len lade jong kine kine Freedom Fighters na ka jylla Meghalaya.”

Na ka liang u Amstrong Pame bad u Director ka Ministry jong ka Pule puthi ka sorkar India u la pynpaw ba kane ka kot ka wanrah ia jingtip kiba thymmai ba wat Ki kynthei ruh kum ka Phan Nonglait na jylla Meghalaya ka la ia ryngkat rynieng kum ka Rani jong ka Jhansi ha ka jingialeh pyrshah ia ka sorkar phareng.

U nongthoh kane ka kot, u Bah Daniel u la kdew, “Ka jingthmu ban pynmih ia kane ka kot ka dei lyngba ka jingiakynduh jingeh jong u nongthoh ba ha por ba u shong skul bad pule ha ki college ym don ki kot ha Jylla Meghalaya kiba la thoh shaphang ki Freedom Fighters kiba la ialeh pyrshah ia ki phareng.”

U nongthoh u la kdew ruh ia Ki jingeh kiba u kynduh ha por ba u thoh ia kane ka kot ba u iaid lyngba na Khasi hills, Jaintia hills, Garo hills, Assam kumjuh ha Bangladesh da kaba ia kynduh markhmat bad kiba ha iing ha sem jong ki nongialeh laitluid. Ha kane ka kot la lah ban pynthikna ia ka jinghiar pateng jong baroh ki nongialeh laitluid.

La ioh ruh ban pynshisha lyngba ki British Record kumjuh bad na ki jingthoh jingtar kiba bniah kiba la ioh ban pynshisha.

Ia kane ka kot la pynmih da ka Ri Khasi Book Agency Shillong, u Kaushal Goyal na Pigeon Books India u la iarap ban pynbit pynbiang ia kane ka kot kum u editor.