Lahduh ka East Khasi Hills ha ka 30th State Karate C’ship

Syllad | The Rising MeghalayaNovember 10, 2024

Ka East Khasi Hills ka la long ka lahduh ha ka kyrdan jong ki shynrang bad kynthei ha ka lympung ialehkai “30th State Karate Championship 2024,” kaba la kut noh ha ka 9 tarik u Naiwieng.

Ka Eastern West Khasi Hills ka la wan ha ka kyrdan kaba ar ha ka liang ki shynrang bad ka Ri Bhoi ka la wan ba ar ha ka liang ki kynthei.

Ia kane ka lympung ialehkai kaba lai sngi kynthih la khot pynlong da ka All Meghalaya Karate-Do Association ha ryngkat ka jingiatreilang bad ka Tnad Directorate of Sports and Youth Affairs ka Sorkar Jylla  hapoh JN Indoor Stadium, Polo.

Ha kane ka lympung ialehkai ba ju pynlong man la u snem ki la don haduh 456 ngut ki nongialehkai Karate kiba la pynrung kyrteng ia lade kiba naduh ka rta 6 snem shaneng, kata ha baroh ki artylli ki bynta jong ka jingialehkai, kata ka Kumite (sparring) bad Kata ((demonstration of form). Ki nongjop na kane ka lympung ialehkai kin shah jied ban mihkhmat ia ka Jylla sha ki lympung ialehkai jong ka Ri bad ha ka Meghalaya Games ka ban sa long shen.

Ha kane ka sngi pynhap pyrda la ia don lang ruh u MP ka Shillong u Dr Ricky AJ Syngkon kum u Kongsan nalor u Working President ka Meghalaya State Olympic Association u Bah John F Kharshiing lem bad kiwei pat ki riew pawkhmat.

Haba aijingkren kum u Kongsan shwa ban pynhap pyrda ia kane ka lympung ialehkai, u Dr Syngkon u la kyntu ia ki nongialehkai Karate ba kin long stad bad shemphang, kiba don ka jingkyrmen bad ban leh ia kiei kiei baroh da ka jingsngewtynnasd bad ka jingkut jingmut.

“Kine ki dei ki jingbam bad ki jinglong kiba kongsan ki ban wanrah ia ka jingkylla ha ka pyrthei,” u la ong. “Da ka jinglong kaba shisha bad ka jingtrei shitom ngi lah ban pynkylla dur ia ka jylla ka jong ngi bad ia kane ka ri kaba khraw jong ngi lyngba ki jingialehkai sports.”

Nalor ki khusnam sha ki kynhun ba la sam da u Kongsan, la sam ruh ia ki khusnam shi met da u Bah Kharshiiing. Kiba la jop ia kine ki khusnam ba kyrpang ki kynthup ia u Fadrick Wanniang (junior boys), Paul Danny Kharmudai (senior men), Audrella C Marbaniang (junior girls) bad Carene Sohiong (senior women). ka Carene ka dei kaba la mihkhmat ia ka Ri Bhoi katba kine ki laingut kiwei pat kiba iakhun na ka bynta ka East Khasi Hills.

Ia kane ka lympung ialehkai Karate la sdang ha ka 7 tarik u Naiwieng hadien ba la wan ban plie da u Deputy Chief Executive Member ka Khasi Hills Autonomous District Council (KHADC), u Bah Pynshngain N Syiem, ha ka jingiadon lang u General Secretary ka Meghalaya State Olympic Association, u Bah Finely L Pariat, bad u Joint Secretary ka MSOA u Bah P Laloo.