Lahduh ka East Khasi Hills ha ka liang ki shynrang bad kynthei haka 29th State Karate Championship

Syllad | The Rising MeghalayaDecember 18, 2023

Ka East Khasi Hills ka la ioh ban rah ia ka nam lahduh ha ka liang ki shynrang bad kynthei ha kaba kut jong ka ka lympung ialehkai ba la tip kum ka “29th State Karate Championship” ha ka 16 tarik Nohprah.

Ia kane ka lympung ialehkai ba ar sngi la pynlong ha JN Indoor Stadium, Polo Shillong da ka All Meghalaya Karate-Do Association (AMKA), lyngba ka jingkyrshan jong ka Tnat Directorate of Sports and Youth Affairs ka Sorkar Meghalaya ha kaba ki la don haduh 372 ngut ki nongwan iashim bynta kiba naduh ka rta hapoh 10 snem haduh kiba la san na ki bynta bapher bapher ka jylla.

Ha kane ka sngi pynhap pyrda la ia don lang ruh u Prof Dr C Daniala, Medical Superintendent of NEIGRIHMS kum u Kongsan kynthup ia u General Secretary ka Meghalaya State Olympic Association (MSOA) u Bah Finely L Pariat,  u Executive Council Member ka MSOA u Bah Dipshon Ryntathiang bad u Deputy Chief Accounts Officer ka MeECL, u Bah Aiborlang Shabong.

Ha kane ka lympung ialehkai la sakhi ruh ia ka rukom iashim bynta kaba long katkum ka standard ha kaba ki nongiashim bynta ki la pynpaw ruh ia la ki jong ki sap ki phong la ka long ha ka jingleh ia ka Kata (form) bad Kumite (sparring) kaba pyni ruh ba ki dei kiba la ioh jinghikai da ki bun bun bnai ne da ki snem kaba la pynlong ruh ia ki nongwan sakhi ba kin kin ai ka jingiaroh.

Ha kane ka lympung ialehkai karate ka Ri Bhoi District ka la wan ha ka kyrdan kaba ar ha ka liang ki shynrang, katba ka West Jaintia Hills ka la wan ba ar ha ka liang ki kynthei.

Ia ka nam Best Karateka ha ka liang ki shynrang la ioh rah da u Hymnson Challam na West Jaintia Hills, kata uba la jop ia ka takma Ksiar ha ka sparring jong ki khynnah 13 snem. Ia ka nam Karateka ha ka liang ki shynrang la ioh rah da u Paul Danny Kharmudai napoh East Khasi Hills, kata da kaba ioh ban khur haduh artylli ki takma ha ka sparring jong ki shynrang kiba palat ia ka 60 kilo ka jingkhia bad ha ka jingialehkai Kata.

Katba ha ka liang ki kynthei, ia ka nam Best Karateka la ioh rah da ka Kimjonlhing Silthou na East Khasi Hills, da kaba jop ia ka takma Ksiar ha ka sparring jong ki kynthei kiba ha ka rta 8 snem. Kumjuh ka Rebeka Nongspung na East Khasi Hills, ka la jop ia ki artylli ki takma ksiar ha ka sparring jong ki kynthei kiba 50 kilo bad ha ka jingialehkai Kata.

Mynta kine ki nongialehkai kin bteng ban shah hikai na ka bynta ban iashim bynta ha ka ‘5th Meghalaya Games’ ka ban long ha u bnai u ban wan ha ka nongbah Tura, West Garo Hills District. Kin don ruh katto katne ki ban pynkhreh na ka bynta kiwei kiwei pat ki jingiakop ki ban long shabar ka jylla.

Na ka liang ka AMKA ka la lah ban sei haduh palat 200 ngut ki nongialehkai karate kiba la wanrah takma bad ia ka nam ka burom lyngba ki rynsan ialehkai bapher bapher hapoh ka ri bad shabar jong ka ri kumjuh, kata hadien ba la seng ia ka naduh kine ki sawphew tylli ki snem kiba la leit noh