Lahduh ka East Khasi Hills ia ka Meghalaya Games kaba san ha Tura

Syllad | The Rising MeghalayaJanuary 20, 2024

Ka lympung ialehkai Meghalaya Games kaba san kaba don baroh 23 tylli ki jait jingialehkai ba la pynlong ha Tura, West Garo Hills District, ka East Khasi Hills District ka la ioh ban kan khur haduh 359 tylli ki takma kata 132 tylli ki takma ksiar, 105 tylli ki takma rupa bad 122 tylli ki takma rnong.

Da kumta kane ka la biang pura ia kane ka district ba kan phong shi syndon ia ka pangsngiat kum ka district kaba lahduh ha kane ka lympung, kaba la wan ruh ban plie pyrda ia ka da ka khliehduh jong ka ri ne ka President ka Drupadi Murmu ha ka 15 tarik mynta u bnai ha PA Sangma Stadium, Tura, West Garo Hills District.

Hooid, ka la don ka jingeh kaba la mih hynrei ynda haba la sdang ia baroh ki jingialehkai ki jingeh ki jingshah tyngjuh la klet lut ia ki baroh, namar ki samla ialehkai jong ka Jylla kiba la wan ban ia lum lang ha Tura ki la long kiba la pynkhreh pat ialade ban kiew rynsan ban iakhun ha madan ban ioh rah ia ka nam bad ka burom.

Ka District kaba wan ba-ar ha ka miej ioh khur takma dei ka Ri Bhoi District kaba la ioh ba kan khur 79 tylli ki takma ba kynthup ia 27 tylli ki takma ksiar, 22 tylli ki takma rupa bad 30 tylli ki takma rnong. Ka West Jaintia Hills District ka la wan ha ka kyrdan balai hadien ba ka la khur 68 tylli ki takma, kynthup ia 25 tylli ki takma ksiar, 18 tylli ki takma rupa bad 25 tylli ki takma rnong.

Ka West Garo Hills kaba long ka district kaba la pdiang ban pynlong ia kane ka lympung ka la ioh ba kan khur 73 tylli ki takma, kata 17 tylli ki takma ksiar, 17 tylli ki takma rupa bad 39 tylli ki takma rnong.

Lada iakhmih kyllum lang ia ka miej ioh khur takma jong baroh ki district kiba la wan iashim bynta, lah pat ban ong ba baroh ki la ia ioh lem ban iarah ne khur ia kita ki takma na ki kyrdan iakhun ne jingiakop bapher bapher ba la pynlong ha kane ka lympung kaba ki takma baroh kiba la dep ban sam baroh ki long haduh 801 tylli.

Haba kren kum u kongsan ha ka janmiet pynhap ia ka pyrda jong kane ka lympung, u Myntri Rangbah ka Jylla u Conrad K Sangma u la kam ba ka Sorkar Jylla ka buh ia ka thong ba kan theh pisa ha ka liang jong ka sports, da kaba phaikhmat ruh artad ban pynioh ia ki madan bad ki jaka ialehkai kiba kyrpang ia ki samla ialehkai jong ka Jylla, da kaba pynkup bor shuh shuh ia kiwei pat kiba don kti ha ka ban kyntiew ia ka sports ha ka Jylla. Nalor kata u la ong ba ka jingpynlong ia kum kine ki lympung ka plie lad na ka bynta ban tieh bniah shuh shuh sa ia kiei pat ki  jingdonkam kiba kum ka Jylla ka donkam ban leh khnang ba kan lah ban wanrah ia ki lympung ialehkai kiba pher bapher kiba da kylla kin long ruh ki lad ban lah ban pynkhreh ia ka National Games, kaba ka sorbah Tura kan long ka jaka kaba lah lem ban pynlong ia ki katto katne ki jingialehkai hapoh jong ka.

Katba na ka liang u Myntri ka tnat ialehkai u Bah Shakliar Warjri um lah khlem da pyrto ia baroh ki samla ialehkai kiba la wan ban iashim bynta sha kane ka lympung. Ki jingjop ka jong ki nongiashim bynta ka long ka bor ka ban iai pynrhem  shuh shuh ia ka mynsiem ialehkai da kaba u kyrmen ruh ba ha kawei ka sngi yn sa mih ki nongialehkai lyngba kane ka lympung ki ban ioh  ban mihkhmat ia ka India ha ki lympung bah ialehkai ha ka pyrthei.

Nalor kata u Bah Shakliar u la kam ba ha ki sngi ki snem ki ban nangwan kin dangiai mih paw shuh shuh kiba bun ki jingtei ia ki jaka ialehkai kiba kynthup ia ka Sunny Hills, Ampati Stadium, P.A. Sangma Indoor Halls, Jengjal, Bajengdoba, bad ha Williamnagar kaba long kum shi bynta ka thong jong ka sorkar ban plie lad ia ki khun samla ba kin kynjoh sha ka thong ha ka jingim ialehkai ka jong ki.   

Ha kane ka sngi la ioh ruh ka jingkren na u Bah Donald Phillips Wahlang (IAS), Chief Secretary ka Sorkar Jylla, Dr. Vijay Kumar D (IAS,) Commissioner & Secretary ka tnat Sports & Youth Affairs, Bah John F. Kharshiing, Working President ka Meghalaya State Olympic Association (MSOA), Bah Finely L Pariat, General Secretary ka MSOA bad kiwei kiwei.