Lahduh ka HK Singh Secondary School, Assam Rifles Public School bad Saiden Secondary School haka Subroto Mukherjee Cup

Syllad | The Rising MeghalayaJuly 28, 2023

Ka HK Singh Secondary School napoh West Jaintia Hills District, ka Assam Rifles Public School ka East Khasi Hills District lem bad ki thei ialehkai ka Saiden Secondary School na Ri-Bhoi District ki long ki lai tylli ki skul ba la ioh ban rah ia ka nam lahduh ka kyrdan iakhun ka U-14 ba dka U-17 Shynrang jong ka State Level Subroto Mukherjee Cup Football Tournament, ba la pyniaid ia ka da ka Directorate of Sports & Youth Affairs.

Baroh lai tylli ki jingiakhun phainal la pynlong haka sngi Thohdieng ha madan jong ka SAI, STC, NEHU.

Haka jingiakhun Under-14, na ka liang ka HK Singh Secondary School, ki la lah ban pynliem noh ia ka KB Memorial Secondary School na East Jaintia Hills District lyngba ka tie breaker kaba long da  4-1.

Katba ha ka jingiakhun jong ka U-17 ki khynnah shynrang, ka Assam Rifles Public School arsien arwat ka la lah ba kan tam shwa shakhmat ia a Rymbai Presbyterian Higher Secondary School jong ka East Jaintia Hills.

Ha kane ka jingiakhun ka Assam Rifles Public School ka la ioh ba kan pynkhih nyngkong ia ka jar lyngba u Phermanbha Lyngdoh ha ka minit kaba 19′, hynrei ym slem ba ka ka Rymbai Presbyterian Higher Secondary School ka la ioh iaka kabu ksiar ba kan pynphai kylla noh ia kane ka shi kol ba ka la shah tam kaba la wan lyngba u Besterly Ksih ha ka minit kaba 21′.

Ha kane ka jingiakhun la mih paw kawei ka penalty hadien ba uwei na ki nongialehkai u jong Assam Rifles Public School, u la shah tan jubor haka kut u nongap kol. Kumta u Phermanbha Lyngdoh ula mih shakhmat ban shut ia kane ka penalty bad um shym la pynlehnohei iaka kabu ksiar kaba ula ioh bad ula lah ban pynkhih biang sa shisien ia ka jar haka minit kaba 38′.

Hadien kane, ka Rymbai Presbyterian Higher Secondary School kala kyntiew iaka rukom ialehkai bad ha ka minit kaba la pynjlan ia ka jingiakhun, ba ka jingbakla hapdeng u player ba ialehkai dien ka Assam Rifles Public School bad u nongap kol, ka pynlong ia u Sokiwa-oo Bareh ba un ioh ia ka kabu ban thep pat ia ka kol kaba ar haka minit kaba 60’+2 naka bynta ka Rymbai Presbyterian Higher Secondary School bad ban tan kylla pat sha ka jingiakhaid kaba mar ar kol.

Da kane ka jingiakhaid, la rah pat ia kane ka jingiakhun sha ka extra time, kaba hangne, ki ar kynhun kim shym la lah ban pynkhih ia ka jar bad haba la poi pat sha ka tie breaker, ka Assam Rifles Public School lyngba ka jingtbit jong ki nongshut ki jong ka ba kan jop ia kane ka jingiakhun da 5-4.

Haba phai pat sha ka jingiakhun jong ka U-17 ki khynnah kynthei, ka kynhun ki thei ialehkai ka Saiden Secondary School, Ri-Bhoi District ki la lah ban pynliem noh ia ka Iew Rynghep Secondary School East Khasi Hills District lyngba ka tie breaker kaba long da 4-2.

U Kongsan ba la wan ban don lang tang shipor ka jingiakhun ka U-17 ki shynrang dei u bah Shakliar Warjri Myntri ba dei khmih ia ka tnat Sports & Youth Affairs, Director ka tnat Sports kong Isawanda Laloo IAS, u working President Meghalaya State Olympic Association bah John F Kharshiing, lem bad ki DSO jong ki kato katne ki distrct bad ba la wan ban pynshit bad ai mynsiem ia ki khynnah ba ialehkai da ki kmie ki kpa bad ki khynnah jong ki skul ba la rung sha ka phainal.

Ha kaba kut jong ka sngi, ka la don ruh ka jingsam ia ki khusnam ba shimet kaba kynthup ia ka nam Best Goalkeeper kjaba ha ka U-17 ki kynthei kane ka nam ka leit sha Yulity T. Phangrang  ka Iewrynghep Secondary School, katba ia ka nam best player of the tournament la rah ia ka da ka Diamon Makhroh ka Saiden Secondary School, ha ka U-14 ki khynnah shynrang ka nam best goalkeeper la rah ia ka da u Novem. F. Siangshai ka KB Memorial Secondary School, best player of the tournament ka leit sha u Budmiha O. Mukhim ka HK Sing Secondary School.

Ha ka U-17, ka nam best goalkeeper ka leit sha u Oinam Abin Singh ka Assam Rifles Public School, bad ka nam best player of the tournament ka leit sha u Bankerbha Dkhar Rymbai Presbyterian H/S School.

Kine ki lai tylli ki skul ba la rah ia ka nam lahduh, kin long artad ki skul ban mihkhmat ia ka jylla Meghalaya sha ka National Level jong ka Subroto Mukherjee Cup.