Lahduh ka Laitkor Sports Club ha ka lympung ialehkai football First Division ka SSA

Syllad | The Rising MeghalayaFebruary 25, 2024

Ka Laitkor Sports Club ka la ioh ban rah ia ka nam lahduh ha ka lympung ialehkai jong ka First Division Football League ka Shillog Sports Association da kaba pynrem noh ia ka Nongrim Hills SC da 4-1.

Da kane ka jingjop ka Laitkor SC ka la ioh ba kan khur pura haduh 15-point katba ka Nongrim Hills SC kan ioh ban bat ia ka kyrdan kaba ar hadien ba ka la ioh ba kan khur 12 point. Baroh kine ki artylli ki kynhun ki la ioh pat ia ka kabu ban pynkhreh ban ia aireng ha ka lympung ialehkai ka Shillong Premier League ne SPL.

Haba phai sha kane ka jingialehkai ba khatduh, ha kylla step ym shym la don satia ki ban ioh ban pynkhih jar. Hynrei mar ia sdang ka kylla miet, ka Nongrim Hills ka la ioh ia ka kabu ban rah ia ka bol shaduh ka kut ka kol jong ka Laitkor SC, ia kaba la lah ban kyrda noh pat ia ka da u rang ap kol bad ki player ba shadien ka Laitkor nangne hi wut ki la ioh ban rah kylla sha ka kut jong ka Nongrim Hills bad ka Laitkor lyngba u Evangel Kharkongor ka la ioh ba kan pynkhih ir ia ka jar.

Hadien kane ka jingsah thep ba kynsan ha ka Laitkor SC, ki rang ialehkai ka Nongrim Hills ki la klumar jingmut bad  kane ka la plei lad ia ka kynhun ka Laitkor SC ba kan ioh ba kan thep biang ia ki artylli ki kol, kata lyngba u Sondy F Kharkongor ha ka minit kaba 63 bud pat sa ka kol kaba lai lyngba u Risuklang Malngiang ha ka minit kaba 66.

Ha ka minit kaba 79 ka Nongrim Hill ka la ioh ia ka kabu ban pynphai kylla  shi kol lyngba u Justerwell Tham, hynrei mar sien ia ai center ka Laitkor SC ka la ioh pat ba kan thep sa ia ka kol kaba saw lyngba u Ryngkat Yanni Ryngksai ha ka minit kaba 79min bad pynskhem syndon ia ka jingjop.

Ha kane ka lympung ialehkai la ia don lang u MLA ka Sohra u bah Gavin Mylliem bad sakhi lang da bah Kyrmen Shylla, bah Damanbait Lamare, bah Hamletson Dohling, President ka Meghalaya Football Association, nangta u Pa’iem Ainam Manik Syiem bad ki Rangbah Shnong Nongrim Hills bad Laitkor, u General Secretary ka MSOA bah Finely L. Pariat, ki dkhot nongkitkam ka SSA lem bad ki paidbah nongkyrshan na baroh ar kynhun.

Ka Laitkor SC kaba la rah ia ka nam lahduh ka la ioh ban rah ia ka song pisa kaba shi lak tyngka, katba ka Nongrim hills ka la ioh T. 50 hajar.