Lahduh ka True North haka 16th State Aquatic Championship ka MSA

Syllad | The Rising MeghalayaOctober 9, 2023

Ka True North ka dei ka kynhun kaba la ioh bun eh ki takma haka “16th State Aquatic Championship” ba la pynlong da ka Meghalaya Swimming Association (MSA) ha ka pung jngi ha Crinoline Swimming Pool, Shillong haka sngi Saitjain jong ka taiew bala dep.

Ka True North kala ioh ban khur haduh 26 tylli ki takma Ksiar (Gold), 21 Silver (Rupa) bad 6 ki Bronze (Rnong).

Kaba wan bar na ki kynhun kiba ioh khur bun tylli ki takma ka dei ka kynhun na Shella kaba la ioh Gold – 14 , Silver – 12 , Bronze -8 , ha ka kyrdan ba lai la ioh rah da ka kynhun na  Mawkyrwat  Gold – 8 , Silver – 14  , Bronze – 12  bad ka Umpung  Gold – 1 , Silver – 2 , Bronze – 2. Kiwei kiwei pat kiba la wan iashim bynta  ki la ioh ban khur Gold – 8  Silver – 8  Bronze – 12.

Ki khynnah kiba la wan iashim bynta ha kane ka jingiakop ki kynthup na kane ka nongbah Shillong, ka thain Shella, Umpung, Mawkyrwat ne wat napoh Rilum Jaintia. Kane ka jingwan iashim bynta jong kine ki khynnah ka la wan long ruh ha ka por ba kane ka bynta jong ka jingialehkai sport ka la sdang ban kiew bha hapoh kane ka jylla.

Ha kane ka jingiakob mynta ka kynti ki la don haduh 166 ngut kaba kynthup 29 ngut ki kynthei bad 87 ngut ki shynrang.

Na ka liang u Secretary ka MSA u Bah Ian Lyngdoh haba iakren sha ki lad pathai khubor u la pynpaw ba ka jingwan iashim bynta jong ki khynnah rit ka dei kaba ai jingkyrmen shibun ia ka Synjuk, ha kaba ula ong ruh ba ka jingpynlong ia kum kine ki lympung iakob ka long ruh ban plielad ia ki khynnah ba kin wan shakhmat ban pynpaw pyrthei ia ka sap kaba ki don ha ki kyrdan iakhun jong ka regional ne wat haduh ka national level.

U Bah Ian u pyntip ruh ba napdeng kine ki nongwan iashim bynta ha kane ka jingiakob kaba mynta yn jied ruh ia ki nongjngi kiba tbit bad ba kynsai ban pynkhreh ban ioh mihkhmat ia ka jylla ha ki lympung iakhun ha ka kyrdan junior bad sub junior nationals bad kumjuh ha kiba bun ki lympung iakhun ban long ha ka thain Shatei lammihngi (North East).

Ioh mihkhmat sawngut ki nongjngi na ka jylla Meghalaya sha ka National Games ka ban long ha Goa

U la ong ruh kumba ka long mynta la sngew donkam ban don noh da ka North East Swimming Forum ha kaba ki jylla na kane ka thain kin iakhun hapdeng jong ki.

Ha kajuh ka por u la ban jur ba ia mynta hi ka jylla ka la donkam ban don noh ia ka pung jngi kaba pura ne ka  Olympic size pool ha kaba kane kan pynlong ia ki khynnah ka jylla ba kin mlien ban jngi ha ka pung kaba 50 meter ka jingjngai namar haba ki mih ban iashim bynta sha ki jingiakob kiba long shabar hadien ba ki la dep ban jngi shwa kumba 25 meter la 25 meter kiba sah pat  ki khynnah ka jylla ki hiar noh namar ba kim mlien ban jngi ha ki pung ba 50 meter.

Haba iadei bad ki coach, u Bah Ian u pynpaw ba ia mynta ka jylla ne ka Synjuk kam don ia u coach uba pura, hynrei bunsien la hap ban wan ialam beit na shabar, hynrei u sngew pat ba kumba long ha kiwei kiwei ki jait jingialehkai imat ka por ka la donkam ba ka jylla kan don noh la u jong u coach u hikai ba pura ha ka jylla.