Lahduh ki skul na Ri Bhoi ia baroh ki laitylli ki nam lahduh ha ka State Level Subroto Cup 2024

Syllad | The Rising MeghalayaJuly 13, 2024

Haka sien kaba nyngkong eh laitylli ki skul napoh Ri Bhoi District ki la ioh ban rah ia ka nam lahduh ha ka “State Level Subroto Mukherjee Cup 2024 Football Tournament” kaba la kut noh ha ka 13 tarik Naitung hapoh Madan SSA, Polo Shillong.

Kine ki lai tylli ki skul ki dei ka Nongjri Presbyterian Secondary School ka la ioh ban rah ia ka nam lahduh ha ka Under-15 jong ki shynrang, ka Christian Higher Secondary School ha ka Under-17 ha ka liang ki kynthei bad ka Myngken Christian Higher Secondary School ha ka Under-17 jong ki shynrang.

Haba phai sha ka jingiakhun final haka Under -15, ka Nongjri Presbyterian ka la lah ban pynrem noh ia ka Government Boys Higher Secondary School (Tura) na West Garo Hills da 4-1 ha kaba sdang jong ka jingialehkai ha kane kasngi ha Madan SSA, Polo.

Ka skul na Tura ka la ioh ban thep nyngkong lyngba u Thang Guo Lun Vaiphei (1) mar ia sdang ka jingialehkai, hynrei ka Nongjri Presbyterian ka la lah ban pynphai haduh 4 kol lyngba u Dabetskhem Rympei (11’P), Chanjip Chetri (13′) bad u Prosperwell Ryntong (ha ka minit kaba 18′, 47′).

Katba ka Christian HSS ka la lah ban pynliem noh da haduh 4-0 pyrshah ia ka Kyrshai Government LP & UP School na West Khasi Hills ha ka final jong ki kynthei lyngba ki kol ba la thep da ka Darika Rani (5′), Rimika Khongkai (20′, 51′) bad ka Pynibha Rangthaluh (25′).

Katba ha ka jingialehkai final kaba khatduh ka Myngken Christain ka la ioh ban thep nyngkong da 2-0 lyngba u Mebankhraw Nongrum (21′) bad u Banganson Nongpalang (42′) pyrshah ia ka North Liberty HSS, West Jaintia Hills, hynrei hadien u Jimal Rasmeet na ka North Liberty u la ioh ban thep ha ka minit kaba (56), hynrei ha ka jingpyrshang ban pyniakhad u Banganson u la ioh ban thep biang ia ka kol kaba ar jong u ha ka minit kaba (65) bad pynlong ia ka Mynken ba kan jop da 3-1.

Ha kane ka sngi pynkut ia kane ka lympung ialehkai ba san sngi kynthih la ia don lang ka Kong Isawanda Laloo, IAS, Secretary Sports & Youth Affairs ka sorkar Jylla kum ka Kongsan nalor u DD Shira, Director of Sports & Youth Affairs, Bah John F. Kharshiing Working President MSOA, Hamletson Dohling President MFA, F. Pariat General Secretary MSOA, Dipshon L. Nongbri General Secretary SSA, PB War Nongbri bad u Bah K Passah, Assistant Director Sports & Youth Affairs bad kiwei kiwei.

Nalor ki lahduh ha kane ka lympung ialehkai, la sam ruh ia ki khusnam shimet kiba kynthup ia ka nam Best Goalkeeper kaba leit sha u Thrisilbirth A Sangma napoh Tura’s Govt Boys HSS (U-15 shynrang), ka Ibashongkun Shylla na ka Christian HSS (U-17 kynthei) bad u Wanpli Malang napoh Myngken Christian HSS (U-17 shynrang).

Katba ia ka nam best player la ioh rah da u Prosperwell Ryntong napoh Nongjri Presbyterian SS (U-15 shynrang), ka Daiamon Marboh napoh Christian HSS (U-17 kynthei) bad u Banplibok Khongjoh ka Myngken Christian HSS (U-17 shynrang).

Ia kane ka lympung ialehkai ba ju pynlong man la ka snem la pynlong da ka Tnat Sports & Youth Affairs ka Sorkar Jylla ha kaba la wan iashim bynta da ki skul kiba tbit tam na ki 12 tylli ki dsitrict ka Jylla.Ki lahduh ha kane ka lympung kin ioh ban mihkhmat ia ka Meghalaya sha ka National-level Subroto Cup 2024 ka ban wan.