Lahkmen Rymbui: Ka kam shet jingbam ka dei ka kharkhana ai kam ai jam kaba heh haka pyrthei

Syllad | The Rising MeghalayaApril 29, 2022

Ka Society for Urban and Rural Empowerment (SURE) haka ryngkat ka jingïatreilang bad ka ophis jong u Deputy Commissioner Jowai, ïa kaba la pynbit pynbiang da ka District Skill Development Officer ka Meghalaya State Skill Development Society, West Jañtia hills kala plie donburom ïa ka Skill Training na ka bynta ki nongshong shnong jong ka shnong Nongtalang haka sngi Balang.

Haba kren lamkhmat ha kane ka jingïalang u Dr. H.H.Mohrmen uba long u nongïalam jong ka SURE ula ïathuh ruh ba ïa kane ka training la kyrshan pisa da ka tnat Border Area Development  West Jañtia hills. Shuh shuh u Dr Mohrmen ula batai ba kin don artylli ki jait kam kiba ka seng kan ai jinghikai ha kane ka training kawei ka dei ka Food Processing bad kawei pat ka dei ka Fast Food bad ka jinghtmu ka long ba kan long ka lad ïohkam ïohjam ïa ki samla kiba pyndep ïa kane ka training. Kane ka training kan long tang naka bynta ki nongshong shnong kiba don ha ki khappud jong ka jylla bad ka Bangladesh. Ka Seng kan pynlong ruh sa artylli kiba kum kine ki training ha Darrang bad ha Nongbareh bad ïa ka assessment bad ka jingai syrnot ïa ki nongwan training yn leh da ka tnat Food and Nutrition jong ka Martin Luther Christian University, Shillong. Ha kane ka training yn hikai ruh ha kaba ïadei bad ka kam kumno ban sengkam sengjam (entrepreneurship) bad kumjuh ruh kumno ba ki nongseng kam kin pan ram na ki bank bad kumno ba kin ïoh ïa ka FSSAI certificate. Ula ïathuh ruh ba dang shen ka sorkar lyngba ka Meghalaya State Skill Development Society kaba hap hapoh ka tnat Labour ka iathuh ïa ka SURE (empanelled) kum kawei na ki seng kaba ka sorkar kan ïatreilang ha kaba ïa dei bad ki kam pyntbit ïa ki sap trei sap ktah jong ki samla.

U Lambhah Kma uba long uwei na ki nongai jinghikai ha kane ka training ula ong ka kam kamai da kaba shet ka dei kaba myntoi bad kaba hap ban trei shitom pat. Ula kyntu ïa ki nongwan training ki ban shim ïa ka training ba kin shimkhia ïa ka ka jingai jinghikai khnang ba kan long ka jingmyntoi ïa ki hadien habud.  U ma Lambor Suchen uba long u District Skill Development Officer ula ong ba ka sorkar lyngba ka Skill Meghalaya ka thmu ban ai jinghikai ïa ki samla ha kiba bun ki sap trei kiba lah ban long ki lad ïohkam ïohjam. U Golden  Rani Assistant Director Border Area Development ula kyntu ïa kito ki ban shim ïa kane ka training ba kin shimkhia ïa ka kam khnang ba kin long ruh ki nongaikam ïa kiwei pat. U  G. L Chyne Mylliem uba long u EAC ha Amlarem Sub Division ula ai kyrkhu khyrdoh ïa ki nowan shah training.

U Myntri ka kam pohïng, ka pule puthi bad kiwei kiwei ka sorkar Meghalaya u ma Lahkmen Rymbui haka jingkren jong u kum u kongsan ha ka jingïalang plie ïa ka jingai jinghikai (training) ïa ki samla ka thañ khappud ula pynkynmaw ba ka kaba shet jingshet ka dei ka kharkhana kaba heh tam haka pyrthei. Ïa kane u myntri ula kren ha ka jingïalang kaba la long ha ka dong Banan jong ka shnong Nongtalang kaba hap hapoh ka Amlarem Sub division. Haba kdew ïa ka jingling kyrpang jong ka thañ ula pynkynmaw ba mynta kila mih shibun ki jaka jngoh kai pyrthei ha ka thañ Amlarem kiba la khring ïa shibun ki nongïaid suwari pyrthei. Shuh shuh u ma Rymbui ula ong ba haba ki nongwan jngohkai pyrthei ki wan sha ki thañ jong ngi ki kwah ban mad ïa ki jingbam tynrai jong ngi, kumta ula kyntu ïa ki nonwan shim jinghikai ba ki dei ban buh ha ki dukan jong ki ïa ki jingbam tynrai kiba la pynbha bad pynitynnad. Ula ong ruh ba ki nongwan jngohkai pyrthei ki kwah ruh ban thied ïa kiei kiei kiba kin ai sngewbha ne ki ban long ki dak ban sahkynmaw (souvenir) ïa ka jingwan jong ki sha kano kano ka jaka, kumta ula kyntu ïa nongwan shim training ba kin shna ïa marbam kiba ki nongsuwari pyrthei kin ïoh ban leit lam sha la ki jong ki ïng.

Ha kawei kawei ka training ym ai training haduh sanphew ngut ki briew ha kine ki artylli ki jait kam bad kynthup ïa baroh lai tylli ki jaka ai training, ka seng kan ai training haduh shispah sanphew ngut ki nongshim jinghikai. Kiwei pat kiba la kren ha kane ka jingïalam ki dei u Rev Enial Lyngdoh Chairman ka Dong Banan, ka Delphine Mystica Bareh bad ka Ilasiewdor Gashnga jong ka SURE.