Lai sngi ai por ka KSU ban mih noh ki bar jylla ba bylla ha Toll Gate Lumshnong

Syllad | The Rising MeghalayaJuly 5, 2019

KHLIEHRIAT: Ka Khasi Students’ Union (KSU) Jaiñtia Hills District Unit hapoh ka jingialam u Ma Ohibait Dkhar President KSU  bad ka jingiatrei lang ka KSU Narpuh Circle ki la leit ban khynra work permit bad labour license ia ki nongtrei barjylla ba trei ha tollgate ba don ha Lumshnong haka sngi Thohdieng.

Ha kane ka jingleit khynra la lap kumba 32 ngut ki nongtrei barjylla ba trei ha katei ka jaka lum khajna (toll plazza), wat tang uwei ruh uba don ïaki kot ki slab a kynthup ïaka work permit ne labour license ban trei bylla ha katei ka jaka.

Ka KSU kala pynpaw ka jingsngew lyngngoh kumno kitei ki barjylla ki ioh ban trei laitluid khlem don satia ki kot ki sla ba biang. Ka KSU hadien ba kala lap ïa kane kala ai por ïa kitei ki nongtrei barjylla ban mih hapoh 3 sngi, kata kin hap ban mih noh katei ka jaka hapoh lai sngi.

U Laitphar Syngkrem Publicity Secretary KSU Jaintia Hills ha u kyrwoh ba ula phah ula kynnoh ba kitei ki nongtrei barjylla ki leh donbor haba ki shong ap khyrdop ha katei ka toll gate, haba ki nongtrei trai shnong kim don. Kitei ki barjylla ki pynthud ia ka leit ka wan ki kali kamai local ne ki kali shimet jong katei ka thaiñ bad ki shaiñ kuna katba mon.

Ka KSU kala kam ba ka jinglum bai khyrdop ka iapher na ka tollgate Lumshnong bad tollgate ba don ha Pasyih West Jaiñtia Hills. Ka tollgate ha Pasyih ki nongtrei ki ithuh kino ki trai shnong ne ki kali kamai local bad ki kali shimet jong ka thaiñ, katba ka tollgate ha Lumshnong kam ithuh satia namar ki dei ki nongtrei barjylla.

Ha kane ka juh hi ka sngi ka seng kam shah shuh ia kitei ki nongtrei barjylla ban bteng trei ha katei ka kyrdop bad ki dei ban mih noh haka sngi nyngkong lym kumta ka KSU kan shim da ki rai ba tyngeh.

Ha katei ka jingkhynra kot sla ka KSU la ia donlang ruh u Ma SS Niangti Finance Secretary KSU JHDU bad katto katne ngut ki dkhot bad Ma KS Suchiang President KSU Narpuh circle bad ki dkhot.