Lait na kti u pulit iohbat ka KSU ia u Kynja 28 Kg

Syllad | The Rising MeghalayaOctober 22, 2022

Wat hadien ba lait na ka kti u Pulit jong ka East Jaintia Hills, pynban ki nongialam bad dkhot ka Khasi Students’ Union, East Jaintia Hills District Unit kila ioh ban kurup ia u kynja ba khia haduh 28 kilo na kawei ka kali na ka khyrdop khynra bar jylla haka shnong Sonapyrdi haka sngi Saitjain.

Ia une u song Kynja uba don haduh saw song ka KSU kala ioh bat na kawei ka kali shimet kaba don ia u nomber AS 11 U 7010 (Grand i10 Hyundai), katba ki ar ngut kiba don ha kane ka kali kila lait phet.

Halor kane ka KSU hadien ba kala suba ba ka don kaei re kaei ha ki song bad suba jur ba ki dei ki tiar khaii beaiñ, kumta mar mar kala mudui da ka jingujor ejahar sha ki pulit. Ki Pulit Anti Narcotic Task Force ka district haba shimti ia kine ki song kila pynthikna ba u dei u kynja. 

U General Secretary ka KSU, East Jaintia Hills District Unit Kwilness Suchiang ula ong ba ka KSU kala buh ia katei ka khyrdop talasi bar jylla bar ri ha katei ka jaka kum ka dak ban pyntreikam hi iaka Inner Line Permit (ILP) ha ka jylla, hadien ba ka sorkar kam lah satia ban pyntreikam.

Ka KSU kala ong ba ka pyni da ki kam khnang ba ka sorkar India kan sngewthuh ban leh ia ka kam. “Lada ka sorkar ka dang kuman bad pynslem, ka seng ruh kan nangiai bteng ban pynlong ka jingkhynra khlem shongthait,” la ong ka KSU.