Lait salit ka longiing na ka jingtwa khyndew ha ka surok bah ha Shangbangla

Syllad | The Rising MeghalayaSeptember 5, 2024

Ki dkhot ka longiing kiba kynthup ia ka kmie, u kpa bad ka khun ki la lait thaw salit na ka jingjia ba sngewsih hadien ka jingtwa khyndew harud ka surok bah National Highway-6 ha ka shnong Shangbangla, Ri Bhoi District, kaba la leit ban ia ka dukan bad ka iing kaba ki shong harud jong kane ka surok bah.

Kane ka jingjia ka la jia ha ka janmiet jong ka 4 tarik Nailur ha ka por kumba 8 baje ei ei, kata hadien ka jingther u lapbah kaba la neh kumba 3 kynta bad kaba la pynlong ruh ia ka khyndew ba ka twa bad leit ban ia katei ka dukan bad ka iingsah jong ki.

Kane ka longing kaba shah ktah ha kane ka jingjia, ka dei ka  jong u Bah Teiborlang Wahlang ha ka Shnong Shangbangla. Ha kane ka jingjia ki la duh lut ia baroh ki jingdon jingem naduh ki tiar ki tar, ki soh ki pai bad kiwei kiwei ki mar ba die ha katei ka dukan.

Na ka liang u Bah Bishos Lawriniang, Rangbah Shnong ka Shangbala u la ong ba ka long kaba donbok ba ha kane ka jingjia twa khyndew kam shym la don stia kano kano ka jingjia ba sngewsih ia ki mynsiem briew, lait noh ka jingjulor ia ka iing bad ki dukan ryngkat ki tiar ki tar.

Nalor kata u la iathuh ruh ha ka shnong Shangbangla ki don kumba 20 tylli ki longiing kiba don hapdeng ka jingma kaba lah ban ktah na ka jingtwa khyndew harud ka surok bah bad u buh ruh ka jingkyrpad ia ka sorkar ba kan thaw ia ki lad ki lynti ban iada bad ban lait na kino kino ki jingjia ba sngewsih.