Lait thaw ka kynthei na Rilum Jaintia na ki nongkhaii briew ha Delhi da ka jingkloi iarap ka KSU Delhi Unit

Syllad | The Rising MeghalayaMarch 8, 2025

Kawei ka kynthei kumba 35 snem rta kaba dei na East Jaintia Hills ka la lait thaw da ka said na ki kti jong ki nongkhaii briew kiba kular ai kam ha Delhi da ka jingkloi wan iarap da ki dkhot ka Khasi Students’ Union (KSU) Delhi Unit.

Ka KSU Delhi Unit lyngba ka President ka Marbiang Khongwir bad General Secretary Nicholas Chyrmang ki pyntip ba ha ka 7 tarik Lber ki la ioh pdiang ia ka phone ha kaba iadei bad kawei ka kynthei kaba la lait phet na ka jingjia jong ka jingpyrshang kam khaii briew.

Hadien ba la poi ha katei ka jaka, ka seng ka la ioh jingtip ba kane ka briew ka dei na East Jaintia Hills bad ka la wan sha Delhi hadien ba ka la shah kular ai kam kum ka nongtrei iing briew. Hynrei, hadien ba ka la wan poi la wan shaw ia ka da ki briew ki bym lah ban ithuh kiba la kam ba kin ialam ia ka sha ka jaka trei.

Ha kum kane ka por kane ka briew ka la sngewthuh ba ka la don ka jingthmu ban die ia ka, bad kumta ka la ioh ban phet krad noh na kane ka jaka.

Ki dkhot ka KSU Delhi kiba kynthup ia ka President, u Organising Secretary u Julian Thabah lem bad ki pulit ba kyrpang na ka SPUNER mardor ki la wan poi ha Old Delhi railway station bad iarap ia ka ban leit ujor hapoh police station jong ka thain. Hadien kane ki dkhot ka seng ki la shim ia ka jingkitkhlieh ban pynthikna ia ka jingleitphai kaba shngain jong ka sha la shnong.

Ka Union ka ai khublei kyrpang ia u Bah D Dkhar na Raliang, SPUNER bad ki pulit Delhi halor ka jingkloi shim khia ka jong u halor kane ka jingjia. Ka Seng ka ai khublei kyrpang ruh ia u Bah Wailadmiki Shylla, MLA ka Jowai Constituency uba la iarap ban pynbiang ia ka jingiarap pisa ban pynbiang na ka bynta ka jingwanphai iing jong kane ka longkmie.

Ka Seng kaba la ju iatyngkhuh khah khah ia kiba kum kine ki jingjia ka kyntu ruh ia ki paidbah ka jylla ba ki dei ban long kiba husiar ha kaba iadei bad ka wad kam wad jam shabar ka Meghalaya, bad ka kyntu ruh ia ki nongshong shnong kiba wad kam wad jam ha Delhi lane ka thain NCR ba kin pyntip sha ka seng hashwa ban pdiang ia kino kino ki jingtyrwa kam lyngba ki agent.