Lait thaw ka MDC Umsning na ka jingmynsaw ba ther maw ki runar ia ka iingsah

Syllad | The Rising MeghalayaApril 10, 2024

Ka Kong Macdalyn S. Mawlong kaba dei ka MDC ka Seng NPP na Umsning Constituency ka la lait thaw na ka jingmynsaw hadien ba ki runar ki bym lah ban ithuh haka 10 tarik Iaiong, ki la wan ban ther maw ia ka iingsah jong ka ha ka shnong Mawlein Mawkhan (Sohkyndur), Ri Bhoi District.

Katkum ka khubor la iathuh ba kane ka jingjia shah thombor ka la jia ha ka por kumba 6 shiteng janmiet katba ka Kong Magdalene ka dang iakren phone ha phyllaw iing ban pynkhreh na ka bynta ban  leit sha ka jingialap ilekshon na ka bynta ka kyrtong jong ka party National People’s Party (NPP), ka Dr Ampareen Lyngdoh.

Halor kane ka jingjia, marmar ki bor pulit ka Ri Bhoi District lem bad ki pulit ka Umiam Police Station ki la hiar sha kane ka jaka na ka bynta ban pynlong ia ka jingtohkit kaba bniah khnang ban lap ia ka jingshisha bad ruh ban thwet ia ki briew kiba donkti ha kane ka kam pyntriem.

Na ka liang ki nongkitkam ka party NPP, Umsning Constituency ki la pynrem jur ia kane ka jingjia bad ki la kyrpad jur ruh ia ki bor jong ka ain ba kin pynlong ia ka jingtohkit kaba bniah halor kane ka jingshah ther maw ka iingsah jong ka MDC.

Kane ka jingjia ka la wan long ruh tang arsngi hadien ka jingmih jong ka huri hura ha ka jingialang ialap elekshon jong ka Seng NPP ha Umsning na ka jingleit pynthut jong ki suba nongkyrshan jong ka Seng VPP.