Lap 39 jait ki jingbam tynrai & dawai kynbat haka jinghikai shaphang ki jingbam ha Mulum

Syllad | The Rising MeghalayaSeptember 6, 2020

Ka jingiaid kjat ban hikai shaphang ka jingbam tynrai hak shnong Mulum, West Jaintia Hills District kala long kaba jop ha kaba la lap haduh 39 tylli ki jingbam bad dawai kynbat kiba tei iaka met u briew.

Ka Society of Urban and Rural Empowerment (SURE) ha ryngkat ka jingïatreilang bad ka North East Slow Food and Agro biodiversity Society (NESFAS) lyngba ka projek ‘No one shall be left behind initiative,’ kila pynlong ïaka Agro Biodiversity Walk (ADB) ka jingïaidkjat ban ïoh jinghikai shaphang ka spah mariang haka 4 tatik u Nailur haka shnong Mulum. Ïa kane ka prokram la pynlong shabar haka kper bad kumjuh ruh sha khlaw bad da kaba bud ryntih ïaki kyndon sorkar (SOP).

Ka jingthmu jong kane ka jingïaid ADB ka long ban hikai ïaki samla shaphang ki jhur, ki soh bad ki dawai kynbad kiba don haka shnong Mulum kaba hap hapoh ka Laskeñ development block jong ka distrik West Jaintia hills. Haka juh ka por ruh ka jingangnud ka long ban ai mynsiem ïaki samla ba kin sngewthuh ïaka jingkordor jong ka spah mariang kaba ngi don bad ban ïada bad sumar ïaka kumjuh.  

Kiba la ïashim bynta ha kane ka jingïaidkjat ki dei ki dkhot jong ka youth club ne seng samla, ki dkhot jongka Participatory Guarantee System (PGS) group bad ki skhot jong ki Self Help Groups (SHGs) kiba don ha kane ka shnong. Ki don 30 ngut ki nongïashim bynta hakane ka jingïaidkjat kaba sdang naduh naka kper-ïng bad nangta ki ïaid pat sha ka khlaw kaba don hajan  jong ka shnong ban pynithuh bad lum jingtip shaphang kita ki jingbam tynrai.

Arngut ki nongbat jingstad tynrai hapoh ka shnong kiba kynthup ïa ka kong Reviancy Suchiang 56 snem ka rta kaba long ruh ka dkhot jong ka Agro biodiversity Learning Circle (ALC) kumjuh ka dkhot ka PGS bad u ma Marki Lamare 25 snem ka rta uba long u nongai dawai kymbat kila lamkhmat ïa kata ka jingïaidkjat ban pynithuh bad hikai ïa kiba ïashim bynta shaphang ki jingbam tynrai bad ki kymbad dawai.

Ka kong Reviancy Suchiang kala ïasam ïaka jingtip jong ka shaphang ki jingthung kiba don ha kane ka thañ kiba ki briew ki pyndonkam ban bam. Kine ki kynthup ïa kiba ki ïoh nala ki jong ki kper bad kumjuh ruh kiba mih ha khlaw. U samla Marki Lamare pat uba la ïohpateng ïa rukom ai dawai kynbad ula ïasam shapha ki jingthung kumjuh ki soh bad ki thied kiba pyndonkam ban shna dawai. Kane ka kynhun kala ïohlum bad buh jingthoh jin haduh 25 jait ki jingthung, 9 jait ki jhur bad jingbam khlaw bad 5 jait ki kynbad dawai. Ki jingbam ki kynthup ruh ïaki dohthli kiba ki ïoh na ki pyntha kba.   

Hashwa ban sdang ïaka prokram ïaidkjat ka Daka Bareh kaba long ka Field Coordinator jong ka SURE kala pdiang sngewbha ïaki nongïashim bynta da kaba batai ruh shaphang ka jingdonkam ban bam ki jingbam kiba teimet kiba lah ban ïoh nala ka kper bad nala ka shnong ka thaw hi. I kren shaphang ka jingriewspah jong ka mariang kaba la don lut haka ïaki jingbam kiba u briew u donkam bad kumjuh ruh ki kynbad dawai.

Ka kong Hamsniawpher Suchiang kaba long ka Community Facilitator haka jingkren jong ka ong ba kyrmen ba ka jingpynlong ïaka ADB walk ka long ban hikai ïaki samla ba kin sngewthuh ïaka jingriewspah jong ka mariang bad ban phrung ha ki ïaka mynsiem ban ïeid ïaka mariang bad kaba ker saswdong sawkun. Ka kong Suchiang ka kynthoh ruh ba ka sngewsih ban ïohi ba ki samla mynta kila jngai naka mariang bad kim nangshuh ban burom ïaka mariang. 

Hadien jong ka jingïaidkjat la pynlong ïaka jingshet jingbamtynrai da kaba pyndonkam da ki jhur ki soh kiba ïoh na kata ka jingïaid lynti hi. Kiba la ïashim bynta haka kynhun khamtam ki samla kila buh shibun ki jingkylli ïa kiba la jubab bad ai jingshai da ki nongbat jingstad tynrai. Ka samla Risa Synnah (18) kala sngewkmen ba kala ïoh ban ïashim bynta ha kum kane ka prokram bad ong ruh ba mynta kala sngewthuh ba kumno ki samla ki dei ban wan shakhmat ban pynneh pynsah ïaka spah mariang bad ban ïada ïa kaba ker sawdong sawkun. Ka Dawanroi Suchiang (17) kala don kajuh ka jingsngewkhia bad ki samla mynta kim nangshuh ban burom ïaka mariang. Ka ai nuksa ba haba kheitsoh haka jaka ban kheit tang ïa u soh ki kdiah pynban wat ïaka tnat ong u diensoh ruh. U ma Phrang Suchiang (70) uba long ruh u nongrep uba la ïawbha (custodian farmer) ula ong ba u isih bha ïaki briew kiba pynjot ïaka mariang. Ula ong ruh ba ka dorbar shnong kala dei ban pynshitom ïa kiba kum kine ki briew da kaba shañ daka kuna kaba heh.

Ïa kane ka project la pyntreikam daka NESFAS ha ryngkat ka jingïatreilang bad ki seng kum ka SURE, ka NEN Nagaland bad ka SSC, Shillong haki katto kate tylli ki districk jong ka jylla Meghalaya bad Nagaland bad la kyrshan pisa daka REC.