Lap ba ka umdih ha ki 44 ki shnong ka nongbah Shillong kam dei kaba shngain; kyntu ka FKJGP ia u CM ban shimkhia

Syllad | The Rising MeghalayaOctober 3, 2023

Ka Food Safety and Standards Authority of India (FSSAI) lyngba ka jingleh ia ki test ba la shim nuksa na ki 46 tylli ki shnong kiba don ha ka nongbah Shillong ka la lap ba ka umbam umdih ha ki 44 tylli ki shnong kam dei satia kaba shngain na ka bynta ka jingkoit jingkhiah.

Ia kane ka kaiphot ka FSSAI kala pynmih hadien ka jingleh ia ki test ia ka um bala leit lum nuksa da ka seng Federation of Khasi Jaintia & Garo People (FKJGP) na ki 46 tylli ki Shnong ka Nongbah Shillong ha ka 22 tarik Nailar ba la dep, kata hadien ka jingioh pdiang ia ka jingujor na ki nongshong shnong namar ka jingjakhlia jong ka um.

Ha ka jingleh ia ki test la lap bad tang ka Shnong Demthring bad Mawblei kiba ioh ia ka umbam umdih kaba shngain na ka bynta ka koit ka khiah. Katkum ka kaiphot la sakhi ba ki um bala lum nuksa na ki 44 tylli ki shnong ki dei kiba don ia ki coliform bad E..coli, ba duna ka pH value, ba bun iron palat ia u pud bad ka bym long kaba shngain ban dih.

Na ka liang ka FKJGP ka pynpaw ba ka jingshem ia ka jingduna ka pH value ha kine ki um bala lum nongmuna ki pyntip ba kine ki um ki dei kiba jur ka acid, bad katkum ka FSSAI standard, ka umbam umdi ka dei ban don ia ka pH value hapdeng 6.5 haduh 8.5. kaba hapoh 6.5 ka dei kaba long acid.

Nalor kata ka la ong ruh ba watla ka jingdon ka iron ka long kaba kongsan ia ka koit ka khiah, hynrei ka jingdon palat pud ka lah ban lam sha ki jingma, kata ka lah ban pynioh ia ka jingpang shini, hemochromatosis, pang kpoh, pyndap lyer ka kpoh, bad jingpang sniehdoh bad ka jingring sti kloi. La pynpaw ruh ba kane ka lah ban pynsniew ia u liver, pancreas, bad klongsnam.

Na ka liang u president ka Seng u Bah Bah Dundee ula ong ba u Myntri Rangbah ka jylla  ula iaroh ia ka sienjam kaba la shim da ka FKJGP kaba dei ka sien kaba nyngkong ban phah test ia ka um ha kylleng ki shnong ha ka nongbah Shillong bad ula pynpaw ruh ia ka jinglyngngoh ban tip ba ka umbam umdih kam long kaba shngain ban dih ban bam.

Shuh shuh u la ong ba na ka liang ka jong ki, ki la dep ban leh ia la ka jong ka bynta ban lum ia ki ka um ban phah test ha ka Food Safety Laboratory kaba la lap ia kane baroh, bad  kumta ki dawa ban ioh ia ka umbam umdih kaba khuid namar ba ki paidbah kiba ioh ia ka um na ka PHE ki da siew ia ka pisa.

Nalor kata u la ong ruh na ka liang u  Myntri Rangbah ka jylla ula kular ban shimkhia ia kane ka jinglap jong ka seng halor ka jingbym shngain jong ka umbam umdih kaba ki paidbah ki ioh.