Lap dien iaka kynhun pynrung tuh ia ki nong Bangladesh sha India, kem ki pulit Meghalaya 3 ngut na Mumbai kurup iaki kot ki sla thok

Syllad | The Rising MeghalayaApril 20, 2025

Ki pulit ka Jylla ki la lapdien ia ka kynhun runar jong ki nong Bangladesh kiba donkti ha ki kam pynrung tuh, kiba pynshna ia ki kot ki sla beain bad ki bank account thok na ka bynta ki nong Bangladesh ha kylleng ka ri India.

Kane ka jingkhynra ka la sdang naduh ka 14 tarik Rymphang 2025 hadien ba ki pulit ki la ioh ia ki jingtip kiba thikna halor ka jingdon jong ka kynhun ki suba nong Bangladesh kiba wankiew na Guwahati sha ka nongbah Shillong.

Haba shim mardor ia ki sienjam, ki pulit ki la pynieng ia ka jaka talasi ha Nongpoh ha kaba ki la ioh ban bat noh ia san ngut ki suba nong Bangladesh, kata saw ngut ki rangbah bad iwei i khynnah.

Watla ha kaba nyngkong kine ki briew ki la pynshisha lyngba ki Aadhaar bad PAN card, hynrei ha ka jingtohkit bniah la shem ia ki jingshisha ba kine ki briew ki dei ki nong Bangladesh kiba la wan rung beain sha India lah kumba ar bnai ei ei da ka jingiarap jong ka kynhun kaba donkti ha ki kam pynrung tuh. Kine ki briew ki la leit ruh shaduh sha Mumbai ban wad kam wad jam bad mynta ki la wanphai da ka jingthmu ban leitphai biang sha Bangladesh.

Kine ki briew ki la phla ba ki la ioh ia ki kot ki sla ban pyni ba ki dei ki nong India, kata naduh ka Aadhaar bad PAN card lyngba u Shaikh Mohd Mujib uba shong ba sah ha ki bynta jong ka thain Sewri ha Mumbai. La kynnoh ba u Mujib u dei uba hakhmat eh uba donkti ban pynbiang ia ki kot ki sla ba shu shna thok na ka bynta ki nong Bangladesh bad uba pynkhreh ruh ia ki briew ban ialam ia ki nong Bangladesh lyngba ki jaka khappud sha ki sorbah kum sha Mumbai, Ahmedabad bad sha kiwei pat ki jaka.

Ha ka jingtohkit la lap shuh shuh ia ki kam bymman ha Mumbai kaba donkti ka Nusrat A Kazi bad u Jabir Yunus Shaikh kiba ju pyndonkam bakla ia ki kot ki sla ba shu thok ban plie bank account ha ka kyrteng jong kine ki nong Bangladesh. Ia kine ki account hadien la pyndonkam na ka bynta ban shim ram bad cybercrime kynthup ka jingdie tuh sha ki briew kiba pyniaid ia ki cybercrime ban kamai pisa da ki kam thok kam shukor.

Hadien kane ka jinglapdien, ka kynhun Special Investigation Team (SIT) na Meghalaya ba la ialam da u Assistant Superintendent of Police (ASP) u Ashu Pant hapoh ka jingbtin lynti jong u SP ka Ri Bhoi u Vivekanand Singh Rathore ka la hiar sha Mumbai ban pynlong ka jingthwet ia ki briew kiba donkti.

Kane ka kynhun kaba la ioh ia ka jingiarap na u Commissioner of Police ka Navi Mumbai u Milind Bharambe bad ka kynhun pulit ka Mumbai ki la pynlong ia ka jingkhynra kaba neh shitaiew ha kylleng ka Navi Mumbai bad South Bombay.

Ha kane ka jingkhynra ki pulit ki la ioh ban kem noh ia ka Nusrat A. Kazi bad u Jabir Yunus Shaikh na Koparkhairane and Ulwe katba ia u Shaikh Mohd Mujib la ioh kem na Rafi Ahmed Kidwai Marg, South Mumbai. Ha kane ka jingkhynra la ioh ruh ban kurup noh ia ki kot ki sla ba shu shna thok, ki kor digital bad ki tiar ba pyndonkam ban shna ia ki ID thok.

Ia kine ki briew kiba la shah kem la wanlam noh sha Meghalaya lyngba ka jingpan jingbit na ka bynta ban pynlong shuh shuh ia ka jingtohkit kaba bniah.

Haba pynpaw ba kane ka jingjia ka dei ka jingpynkyndit bynriew halor ki kam shongshngain hapoh ka ri, u SP ka Ribhoi u la ong, “Kane ka jingjia kam dei satia kaba shu jia ryngkhat, hynrei ka dei ka kam bymman kaba la pynkhreh janai na ka bynta ban pynrung tuh ia ki briew napoh Bangladesh, ban shna thok ia ki kot ki sla bad ban leh ia ki kam shukor pisa ki ban ktah jur ia ka jingshngain jong ka ri. Namar ki jaka khappud kiba laitlan bad ka Bangladesh, khamtam ha ki jylla kum ka Meghalaya bad ka kynrum kynram sain pyrthei ha Bangladesh, ka jingsyier na ki kam wan rungtuh ka la nang jur.

Nalor kata u Rathore u la ong ruh ba ka jingseisoh jong kane ka jingkhynra ka pynpaw ia ka jingiatreilang kaba pura hapdeng ki bor pulit ka Meghalaya bad ki pulit ka Mumbai ia kaba la pyntreikam hapoh ka jingialam jong u CP ka Navi Mumbai u Milind Bharambe bad u SP ka  Ri-Bhoi.