Lap ia ka metiap ka longkmie bad ka heprit 5 snem na wah khlaw NEHU

Syllad | The Rising MeghalayaSeptember 19, 2024

Ka longkmie bad i heprit ba jah, la lap noh iaka metiap jong ki ha kawei ka wah ha khlaw NEHU haka 19 tarik Nailur.

Ia ka metiap jong kine ki ar ngut la lap da ki khynnah ki la thmu ban leit sum sha ka wah Khlaw NEHU ki la pynpaw ia ka jingkyndit ban lap pynban ia ki artylli ki metiap kiba per halor jong kane ka wah.

Hadien la ioh jingtip ba kine ki metiap ki dei jong ka Kong Niancy Riahtam bad i heprit Erika Thabah iba dang 5 snem rta kiba la jah naduh ka step jong ka 18 tarik Nailur.

Katkum ka khubor la iathuh ba kane ka longkmie kaba trei ha Punjab Bank ka la leit ban peit ia ka iing kaba dang shna shajan ISBT ha Mawiong ha ka por 10 baje mynstep jong ka 18 tarik Nailur ha kaba ka la ialam ruh ia kawei ka heprit 5 snem rta kaba dei ka khun jong ki para marjan.

La iathuh ruh ba ki la don ki briew kiba iohi ia kine ki arngut ha ka por 4 baje janmiet ha ka por ba ki la hiar na ka kali ha Macdonald Road Mawiong Umjapung.

Hynrei, na ka liang kiba haiing ki la pyntip sha ka shnong ha ka por 9 baje mynmiet hadien ba ki khlem wanphai shuh sha iing, bad na ka liang ka shnong ruh ka la pyntip mar mar sha ki bor pulit bad pynlong ruh ka jingleit wad shnong haduh ka por 3 baje mynstep hynrei kim shym la lapdien satia.

Hynrei haka ka por kumba 12 baje mynsngi haka 19 tarik Nailur, ki khynnah kiba thmu ban leit sum sha katei ka wah ki la lapdien ia kine ki metiap bad wan pyntip mar mar shapoh shnong bad kiba la pyntip ruh sha ki pulit.

Na ka liang ki pulit ha ryngkat ka kynhun Search & Rescue Team bad na ka Tnad Fire & Emergency ruh mar mar ki la her sha katei ka jaska ban sei ia kine ki metiap.

Ine i heprit ba la khlad noh i dei i khun synrap ha kaba iwei pat i dei u shynrang.

Ia ka daw tynrai halor jong kane ka jingjia ba sngewsih ym pat lah ban tip thikna bad na ka liang ki pulit ki la sdang ban pynlong ia ka jingtohkit.