Lap ia ka Scooty ba shah rong tuh na Jowai na ka jaka khlaw ha Demthring

Syllad | The Rising MeghalayaMarch 28, 2025

Ki bor pulit ha ka 27 tarik Lber ki la lapdien noh ia kawei ka Scooty kaba la shah rongtuh ha ki briew ki bym lah ban ithuh na ka jaka ieng na Riatsasim, Jowai na kawei ka jaka ba long khlaw na ka thain Demthring.

Kane ka la wan long hadien ba u trai jong kane ka Scooty rong blu bad iong kaba don ia u Nombor No. ML 04 E 3318 (Yamaha B6) u Thombor Sayoo uba dei na ka shnong Mynska u la leit ban ujor shapoh Police Station ha kaba iadei bad kane ka jingshah rong tuh kane ka Scooty jong u na katei ka jaka ieng ha ka por kumba 4:30 baje mynsep.

Hadien ba la ioh ia ka jingtip, ki pulit mardor ki la pynlong ka jingthwet kaba jur hynrei kim shym la lapdien satia.

Hynrei, hadien ka jingtohkit bniah da ka kynhun ba kyrpang ha ka por kumba 3 baje janmiet kane ka kynhun na Demthring ka la pyntip ba ka don kawei ka Scooty kaba don ia u nombor ML 04 E 3318 ba la ieh ha kawei ka jaka ba long khlaw.

Kumta na ka liang ka kynhun ki pulit mardor ki la pynlong ia ka jingtohkit bad hadien ba ki la wan poi ha katei ka jaka ki la shimti noh ia kane ka Scooty bad pynthikna ba ka dei kaba la shah tuh.

Hadien ka jingpynthikna kaba bniah ia u trai kumta ruh la aiti noh ia kane ka Scooty sha u trai uba dei hok.