Lap iaka metiap ka longkmie kaba jah na Wapung Shnong, pynrem ka KSU

Syllad | The Rising MeghalayaDecember 31, 2023

Kawei ka longkmie kaba jah naduh ka 25 tarik Nohprah, la lap noh iaka metiap ka jong ka da ki paidbah haka step 31 tarik Nohprah ha Mookhep, East Jaintia Hills District.

Kane ka longkmie dei kaba la tip kyrteng kum ka Kong Lita Ryngkhlem kaba na Wapung Shnong.

Ki pulit kiba la ioh jingtip halor kane, ki la hiar sha katei ka jaka bad ki suba ba kane ka longkmie ka shah pyniap. La wan ruh da ki pulit shemphang ryngkat bad ki Dog Squad na Shillong.

Iaka met iap jong kane ka longkmie la pynkit sha hospital ban leh iaka post mortem bad kiwei ki jingdonkam jong ka aiñ.

Ha u kyrwoh ba la phah da u Hamewanpynhun Ryngkhlem general secretary KSU Wapung Unit kala pynrem jur iaka jingshah dkhat jubor iaka jingim jong kane ka longkmie.

Ka KSU kala pynpaw ba kane ka jingjia kala pynsgewsih bad ktah mationg iaka imlang sahlang ha kaba ki riew thrang snam kim don shuh ia ka mynsiem para briew. Ka seng KSU kala kyntu jur ba ki bor jong ka aiñ ban shimkhia ban wad ia ki riew thrang snam kiba donkti ha kane ka kam pyniap bad ban pynshitom ia ki daka tyngeh. Ka KSU ka khmih lynti ba ka jingtohkit ki pulit kan long kaba seisoh ban ai ka jingbishar kaba hok ia kane ka longkmie bad kiba haiing hasem jong ka.

Ka seng KSU ha kajuh ka por ka phah iaka khubor sngewlem sha kiba ha iing ha sem kane ka longkmie.