Lap ka HYC ba slem ki scholarship jong ki samla pule ba ai dier por ia ka utilization certification

Syllad | The Rising MeghalayaJanuary 25, 2025

Ka Education Cell jong ka Seng Hynñiewtrep Youths’ Council (HYC) ha ka 24 tarik Kyllalyngkot ka la kyntu ia ka jingtuklar ba mardor jong ka sorkar Jylla ha kaba iadei bad ka jingpynslem ban pyllait ia ka scholarship jong ki samla pule ka jylla man la u snem, khamtam ia ka pre-matric bad post-matric scholarship hapoh jong ka “Umbrella Scheme”.

“Ha ka jingtohkit bniah ba dang shen ka jong ngi lyngba ka Right to Information (RTI) Act na ka Ministry of Education la shem ba ki daw jong kane ka jingpynslem ka dei namar ka jingslem ban aiti ia ki Utilization Certificate sha ka Ministry of Education.Ka Ministry ka la buh da ka por na ka bynta ban aiti ia ki UC kaba dei ha u bnai Nailur man la u snem,” ong ka HYC.

Ha ka shithi sha u Commissioner & Secretary ka Education u Vijay Mantri long ka Seng ka la ong, “Ka long kaba donkam ba ka jylla ka dei ban bud ryntih ia kane ka jingbuh por khnang ban pynthikna ban ioh pyllait ia ka scholarship ha ka por kaba biang. Ngi kyntu ia ka Tnad jong phi ban buh hakhmat ia ka jingaiti ia kine ki Certificate khnang ban lait noh na ka jingpynslem ban pyllait ia ka scholarship.”

Ka Seng ka la ong ba kine ki jingpynslem ki la long ki mat kiba iai bteng bad kiba ktah jur ia ka jingpule jong kiba bun ki samla pule ha ka jylla. Ka jingpyllait ia ki scholarship ha ka por kaba biang ka long kaba kongsan bha ban pynthikna ba ki samla pule kin lah ban bteng ia ka jingpule jong ki khlem jingeh ha ka liang ka pisa tyngka.

Ban weng ia kane ka jingeh jong ka jingpynslem, ka seng HYC ka la aijingmut ruh ba nalor ka jingkongsan ban shimkhia halor kane ka bynta, ka tyrwa ruh ban don noh ia la ka jong ka shnat Scholarship Cell hapoh ka tnat pule puthi khnang ba kane ka Cell kan shim ia ka jingkitkhlieh ha ka ban khmih laitluid ia baroh ki kam kiba iadei bad ka scholarship.

Nalor kata ka la ong ruh da kaba don la ka jong ka special cell ka ban pynleit jingmut beit thik tang ha kaba iadei bad ki scholarship, ka Tnad pule puthi kan lah ban pynduna ia ki jingeh ha ka jingpynslem lyngba ki heh ophisar kiba la khia lypa namar kiwei kiwei pat ki jingkitkhlieh.Kane ka special cell kan pynbha ruh ia ka jingiadei bad ka jingiatreilang hapdeng baroh kiba don bynta lang ha ka kam kaba iadei bad ka jingai ia ka scholarship.