Lap ka JSU ba iaid sahuh ki trok kit maw kit shyiap haka jingkieng ba synjor ha Mynso

Syllad | The Rising MeghalayaJune 4, 2020

Ka Jaintia Students’ Union Mynso Unit kala ioh ban bat ia ki trok ba kit palat pud ba iaid lyngba ka jingkieng wahmyntang kaba don ha shnong Mynso, kaba la pynbna ba la synjor bad khang pyrshah ban kit khia lyngba katei ka jingkieng.

Kine ki trok kiba kit palat pud kiba don ia u number ML 11 2113 bad ML 04 B 1999 kidei kiba kit shyiap ia u Lakhon Phawa.

Kane ka jingkieng kadei kaba pyniasoh ia bun tylli ki shnong ha katei ka thain naduh Thadialong, Samatan, Shiliang Myntang, Thangrain, Barato bad lada ka ur hap kan wanrah ka jingduh myntoi ia u paidbah ka thain.

Ka JSU ka ong ba u Distict Magistrate ka West Jaintia Hills District ula pynjarai da ka kyndon aiñ katkum ka section 144 CrPC khanglad iaka trok ba kit mar ba palat iaka 9 metric tonnes, hynrei  ka JSU kala kynnoh bun ki riew shimet kiba ym burom ia hukum u magistor.

Ka JSU kala aiti ia kine ar tylli ki trok sha ki pulit jong ka Phramer Traffic Cell bad ka jingtohkit pyrshah iaki kala iaid shakhmat.