Lap ka shnong Sonapyrdi ba lait tuh ki bar jylla na Ratacherra khlem jurip khlam COVID-19

Syllad | The Rising MeghalayaJuly 28, 2020

Ka Dorbar Shnong Sonapyrdi, East Jaintia Hills District kala pynpaw ka jingbynniaw kaba khraw hadien ba lait tuh ki bar jylla khlem jurip ne screening na Ratacherra ka khyrdop entry exit point, ka jaka kaba la buh naka bynta jurip iaki briew kiba wan na bar jylla.

U Waheh Shnong jong ak Sonapyrdi, u ma Edimon Lamare bad Secretary Shnong Ma Daiapherbha Lamare kila iathuh ba ha ka 27 tarik une u bnai mar sien ioh jingtip ba don ki bar jylla ba rung tuh napoh Assam ha Lad Lum Tongseng kaba hap hapoh u pud u sam ka shnong ki la leit mar mar sha kane ka jaka ryngkat ki VDP jong ka shnong.

Ha kane ka jingjurip kila lap ar ngut ki bar jylla ba kyrteng u Numan Uddin bad ka Salma Begum kiba na ka shnong Patharkandi, Karimganj District, Assam kila wan rung shapoh Meghalaya lyngba ka khyrdop jong ka Ratacherra check point.

Haba la kylli kumno ki lait, kine ki nongialam kila ong ba kine ki bar jylla kila rieh ha jrong trok ban lait naka jingjurip ne screening khlam COVID-19 bad pynkhein iaka jingbthah jong ka Sorkar.

Ka bor shnong kala pyntip sha u officer Incharge ka Lumshnong Police Station bad la pynphai biang iaki na ka shnong kaba ki wan. Kine ki bar jylla kila wan naduh ka 22 tarik une u bnai.

Ka bor shnong Sunapyrdi kala kyntu ia ka sorkar lyngba ka District Administration ban pyrkhing bha ha ka rukom check ia ki kali bad ia ki briew kiba wan nabar ruh namar bunsien ki bar jylla ki rieh hajrong truck tang ban lait na ka screening ha ki khyrdop kaba don ha Ratacherra.