Lap ki dkhot ka KYKWM ia ki sakhi jong ka jingkylla rong ka wah Myntdu

Syllad | The Rising MeghalayaNovember 17, 2021

Ki dkhot ka sein Khooid Ya ka Wah Myntdu, (KYKWM) West Jaintia Hills District hadien ba ki la ioh ïa ka jingujor ha ka 16 tarik Naiwieng ba ka la don ka jingkyllarong jong ka um ha shilynter ka thwei wah Myntdu ha Syntu Ksiar. Mynta ka sngi ki dkhot ka KYKWM ki la hiar sha ki bynta ka wah Myntdu ha jaka pynlum um dih un bam ka ophis EE PHE (Electrical) Jowai bad ha ki bynta ba sharum badon hapoh u pud u ang ka shnong Chilliangraij ban pynshisha da la ki khmat ia ka jingkylla rong ka wah Myntdu na ka daw ka jingiohlad ki briew ban bret pathar ia ka khyndew  sha ki bynta jong ki liar ki ban tuid sha ka wah Myntdu.

Ha kane ka jingbuddien ki dkhot ka seng ha ka jingialam u u Khroo Lamsalanki Pariat bad u Orilan Shylla, ki la lap shisha ia ka jingkylla rong ka wah ha ka bynta batip kum ka Trepariat bad kane ka wan na ka bynta jong ka liar Thlumusniang bad U Khroo Lamsalanki Pariat, President ka Seng haba iohi ia kane ka jingkyllarong jong ka wah u la kynnoh ba ka daw ka dei na ka jingiohlad ki briew ban bret pathar ia ka khyndew bad pynhap ha ki liar ki wahduid kiba tuid sha ki bynta ka wah Myntdu.

U DH Pde, Waheh Chnong ka Chilliangraij haba iakren u la pynsngew ba ka thong ban iada bad pynneh pynsah ia ki um ki wah, ki khlaw ki btap, ki sim ki doh ka Dorbar Chnong ka la buh ia ki jingmana bad haba iadei pat bad ka jingbret pathar ia ka khyndew ne ki jakhlia jakhlait ha ka wah Myntdu kaba hapoh u pud u ang ka shnong ka Dorbar Shnong kan shim  ban leh ia kaba donkam.

U Khroo Lamsalanki Pariat, President ka Sein Khooid Ya Ka Wah Myntdu kum u briew ba don ka jingkitkhlieh ia ka Wah Myntdu bad ka lawei jong ki nongshongshnong jong ka Jowai bad ki shnong ha shilynter ka wah Myntdu, u la khot bad wer ia ki nongshongshnong ban kin iatrei ryngkatlang na ka bynta ban shngain ka jingim  bad khamtam ruh u da kyrpad sashisien ia u Bah Garod LSN Dykes (IAS) Deputy Commissioner bad ïa u Bikram Marak (MPS) Superintendent of Police ka West Jaiñtia hills District ba kin sngewbha ban shimkhia ban leh da kaba tyngeh katkum ka hukum ki kyndon ka aiñ sec 144 CrPC kaba ki la hukum paidbah pyrshah ïa kiba leh beaiñ ha shilynter jong ka wah Myntdu.