Lap ki Saiantis ia u Sher Syngkai ba kham pher napoh ki krem ha Rilum Garo
U Schistura sonarengaensis u dei u dohkha Sher Syngkai ba ka pyrthei saians kam pat tip tad haduh ba u Dr Khlur Mukhim bad ki paralok saiantis jong u ki la pule bniah bad batai ia ki jinglong ba kyrpang jong une u Sher Syngkai ba la tong nuksa napoh ki lai tylli ki krem kiba don ha South Garo Hills, Meghalaya kata ka (Krem Sonarenga, Krem Nakama bad Krem Chiabol).
La ai kyrteng Latin ia une u dohsher na ka kyrteng jong kawei na kita ki krem, ka krem Sonarenga, kaba don kumba 10KM sharum na ka Krem Siju ha ka lynti kyndong ban leit sha Baghmara.
Ki jingbun bad rukom thoh-iong ki snep jong une u dohsher bathymmai ki kham pher na kiwei pat ki dohsher ba marjan ia kiba ki saiantis ki la batai ha ki snem ba la dep, kum u Schistura sijuensis (na Krem Siju, South Garo Hills, da u Ambat Menon, 1987) bad Schistura syngkai (na Twahdidoh ka Ri Lyngngam, da u Khlur Mukhim, 2019).
Une jait dohkha ki khmat jong ka ki lah ban iohi, ym kum kiba lap ha ki krem ha Ril Jaintia.
Ia kane ka jingwad bniah la kyrshan da ka ICAR – National Bureau of Fish Genetic Resources kaba don ha Lucknow. La lap ia kane ka Sher Syngkai da ka kynhun na ka Lady Keane College bad na Guwahati University.
Ïa kane ka kot wad bniah la pynmih paidbah haka 2 tarik Nailar ha ka Wiley-Blackwell ka international journal of Fish Biology of the Fisheries Society of the British Isles. Katkum ka ka Wiley-Blackwell, une jait dohkha bathymmai, Schistura sonarengaensis sp nov. u dei uba suk ban pyniapher na kiwei pat ki jaid Schistura ha ki Barak-Surma-Meghna bad ki wah ba marjan jong ka thain shatei lam mihngi jong ka ri India (lait noh u S. syngkai).
Na ka liang u Dr Mukhim u da sngewnguh eh ia u Milton M.Sangma bad ki paralok jong u kiba la iarap shibun ha ki jingleit rung krem jong u ha ki Lum Garo.
Facebook
Instagram
Youtube
Twitter
Leave a Reply