Lap metiap ba per ha wah Umiam, dei u Engineer uba jah rngai

Syllad | The Rising MeghalayaMay 21, 2024

Ki pulit hynne ka step sngi ba Ar ki la lapdien ia kawei ka metiap u rangbah kaba per ha Wah Umiam hajan Umroi Nongrah, Ri Bhoi District.

Hadien ki pulit ki la lah ban sei noh ia kane ka met da ka jingiarap jong ki nongshong shnong.

Ha ka jingtohkit la ioh jingtip na kiba haiing hasem ba une u rangbah u kyrteng u Ron Cooper Massar 54 snem rta uba dei na ka shnong Umroi Jaiawpdeng, Ri Bhoi District, bad  ki la iathuh ruh ba u jah na la iing ha ka step phyrngab jong ka 20 tarik mynta u bnai katba u dang leit mareh step, kata ka jingjia ia kaba ki la leit ruh ban ai da ka ejahar hapoh Umroi PIC.

Hadien ba la pynlong shuh shuh ia ka jingtohkit la suba jur ba kane ka jingjia ka lah ban dei ka jingngam jyllop.

Nalor kata la pyntip ruh ba une u briew u dei uba trei kum u Junior Engineer hapoh ka Tnat Water Conservation, Shillong.

Na ka liang ki pulit ki la pynkynriah noh ia ka met sha Nongpoh Civil Hospital na ka bynta ban leh ia ka post mortem khnang ban pynthikna ia ka daw jong ka jingiap.