Lap thymmai iaka jingdon ki nongpang HIV ha East Jaintia Hills

Syllad | The Rising MeghalayaJune 13, 2023

Ka health Camp ban it iaki nongpang kiba kit iaka jingpang HIV ha East Jaintia Hills District kala lap thymmai iaka jingdon ki briew kiba bit ia kane ka jingpang.

Ia kane la ong da u Bah A. Lanong Deputy Director (Main Streaming) Meghalaya AIDS Control Society, Shillong. Ula ïathuh naduh ka 2 tarik Jylliew haduh mynta la dep ban pynlong 8 tylli ki Health Camp sha ki 40 tylli ki shnong jong ka East Jaintia Hills District bad kiba la wan shakhmat sha kine ki Health Camp ki long 1516 ngut bad na kine 8 ngut dei kiba kit ïa u khñiang jingpang HIV.

Kane ka health camp ka dei kaba la tip kum ka Integrated Health Campaign, Extended Outreach Camps kaba la pynlong da ka Meghalaya AIDS Control Society ryngkat ka jingiatreilang ka bor pyniaid district East jaintia hills bad ka ophis u District Medical Health Officer ka District bad kiwei kiwei ki tnad sorkar.

U Bah Lanong ula iathuh shuh shuh ba ïa kane ka campaign la buh thong ban pyndep hapoh lai bnai ka ban kut ha u Nailar 2023 bad kin leit sha ki 198 tylli ki shnong na ki 63 tylli ki Health Camp.

Haduh u bnai Rymphang (February) 2023, ki briew kiba im bad u khñiang jingpang HIV hapoh ka Jylla ki don 7000 tam ngut kiba la dep ban register bad ka Society bad kiba shim ïa u dawai ART ki don kumba 4700 ngut, la ong u Bah Lanong.

Da ka thong ban pynthikna ban pynioh ia u nongshong shnong ia ka met kaba koit kaba khiah bad ban iada na ki jingpang haka sngi ba Ar, la pynlong biang ia kane ka health camp ha Lad Rymbai Dongwah ha kaba ka MLA Sutnga Saipung Kong Santa Mary Shylla kala long ka kongsan haka jingiadonlang  DC Abhilash Baranwal, ki ophis ka tnad ka koit ka khiah bad kiwei kiwei.

Ka kong Santa Mary kala pynpaw ka jingsngewkhia namar ba ka East Jaintia Hills District kadei kawei na ki District hapoh ka ri India kaba don bun ki briew kiba shah ktah ha u khñiang jingpang HIV.

Ka Kong Shylla ka la kyntu ïaki nongshong shnong ba kimdei ban lehraiñ hynrei ban mihshakhmat ban jurip iaka koit ka khiah khnang ban ai ka jingiada ialade bad ban lait ban pynsaphriang iaka kane ka jingpang

U Deputy Commissioner ka East Jaintia Hills District u Abhilash Baranwal, IAS ula ong, ka East Jaiñtia Hills District kadei ka district kaba la kiew bha haka jingdon ïa u khñiang jingpang HIV. Ula ong lada leh screening bad test ïaki 100 ngut ki briew kumba 2.8% kin ïoh ïa u khñiang jingpang HIV.

Ula ong, katkum ka kaiphot ba la ïoh lum, ki don haduh 2,500 ngut ki briew hapoh ka district kiba im lang bad une u khñiang jingpang HIV bad lada shim jingkheiñ bniah kin don palat ïaka 4,000 ngut.

Ula kyntu ïaki nongshong shnong ban wan shakhmat ban phah test khnang ba kin lah ban ïada ialade, ïaka ïing ka sem bad ïaka imlang ka sahlang.

Ula ban jur ruh ïaki nongshong shnong ba kimdei ban tieng ban phah test namar ka jingtest ka long kaba jar jar ka ban nym pynbna lada don ne lada ym don ïa uta u khñiang jingpang. Ula pyni nuksa ban test shuwa ialade ban pynshlur ia ki nongshong shnong ban tip iaka jinglong jingman jong ka koit ka khiah jong uwei pa uwei u nongshong shnong.

Ïaka jingïalang la pynïaid da u J. Shylla Additional Deputy Commissioner, East Jaintia Hills District haka jingdonlang u R. Brahma, EAC, ka Dr J.N. Shullai Director jong ka Mihmyntdu Community Social Welfare Association (MCSWA).

Kane ka health camp la pynlong ruh ha Lad Rymbai Datsympein Community Hall, Lad Rymbai B, Mooknor Community ha kaba ki paidbah kila wan ban phah test ïalade n aka bynta ka jingpang HIV, STD, STI, Hepatitis B, Hepatitis C, Tuberculosis, bad la pynrung kyrteng ruh ïaki nongshong shnong haki MHIS bad Aadhaar ha kine ki camp.