Lashai ka phainal ka State Level Subroto Mukherjee Cup Football Tournament, ka East Jaintia Hills kan iaknieh haki ar kyrdan, ka HK Sing na West Jaintia Hills

Syllad | The Rising MeghalayaJuly 27, 2023

Ka rynsan kala long pat kaba la pynkhreh naka bynta ka phainal jong ka state level Subroto Mukherjee Cup Football Tournament, ba pynlong ia ka da ka Directorate of Sports & Youth Affairs ka sorkar jylla.

Ki skul ba la jam sha ka phainal ha kane ka kynti kaba mynta ka long ba ha ka U-14 ki shynrang, ki skul ban iaknieh ia ka nam lahduh ki long ka KB Memorial Secondary School na East Jaintia Hills kaban aireng pyrshah ia ka HK Sing Secondary School na West Jaintia Hills, katba haka U-17 ki khynnah shynrang, ka jingiaknieh ia ka nam lahduh kan long hapdeng ka Assam Rifle Public School na East Khasi Hills pyrshah ia ka Rymbai Presbyterian Hr. Sec. School na East Jaintia Hills, bad ha ka U-17  jong ki kynthei, ki artylli ki skul ba la jam sha ka phainal ki long ka Saiden Secondary School na Ri Bhoi pyrshah ia ka Iewrynghep Secondary School na East Khasi Hills.

Baroh lai tylli ki jingiakun kin long ha ka por 9:00 baje mynstep, 11:00 baje mynsngi bad 2:00 baje mynsngi ha madan ialehkai phubol ka SAI, STC, NEHU.

Haba phai sha ki jingiakhun ia ki semifinal ba la long haka sngi Palei, ha ka U-14 ki shynrang, ka KB Memorial Secondary School (East Jaintia Hills) ka la lah ba kan pynliem noh ia ka Mari Apal, UPS, Mangsang (East Garo Hills) da 2-0 bad ia kine ki kol la thep ia ki da u Ebiangmi Siangshai ha ka minit ba 17 bad  ka own goal lyngba u Griksrang Marak  ha ka minit ba 60.

Ha kawei pat ka jingiakhun, ka HK Sing Secondary School (West Jaintia Hills) kala lah ba kan pynliem noh ia ka Myngken Higher Secondary School (Ri-Bhoi) da  3-2, ia ki kol ka HK Sing Secondary School la thep ia ki da u Budmi-ha-oo Mukhim uba la the par kol ha ka minit kaba  3 bad 60 min bad sa shi kol la thep da u Kynsai-I-manmi War ha ka minit ba 20, ia ki ar kol ka Myngken Hr Sec Sch la thep ia ki da u Me-uba-ai Sumer 14 min bad Chanjib Chettri minit ba 54.

Katba ka resol na ka jingialehkai ka U-17 ki shynrang, ka jingiakhun hapdeng ka Sibsingh Memorial Govt. Higher Secondary School (West Khasi Hills) pyrshah ia ka Assam Rifle Public School (East Khasi Hills) ka long ba haduh ba la kut ka por ba la buh ki ar kynhun ki la lah shwa ban iakhaid da mar shi kol, ha kaba u Rosangzela ka Assam Rifles Public School u la ioh ban pynkhih nyngkong ia ka jar ha ka minit ba 65, hynrei san minit hadien jong kane ka kol, ka Sibsing Memorial Govt. Higher Sec. School ka la ioh ba kan pynphai kylla ia kane ka shi kol lyngba u Rishandabok Marwein, haba la rah pat sha ka tie breaker, ka Assam Rifles Public School ka la jop da  3-2.

Ha kawei pat ka jingialehkai, ki kol lyngba u Bankerbha Dkhar (23 min) bad na u Besterly Ksih (38 mins) ka la biang pura ia ka kynhun ialehkai jong ka Rymbai Presbyterian Higher Secondary School (East Jaintia Hills) ba kan pynliem da 2-0 ia ka Okkapara Secondary School (South West Garo Hills).

Haba phai sha ka semifinal ka U-17 ki kynthei, ka Saiden Secondary School (Ri-Bhoi) ka la lah ba kan pynliem lyngba ka tie breaker ia ka Sibsingh Memorial Govt. Sec. School (West Khasi Hills) da 4-2, ka khana jong kane ka jingiakhun hapdeng kine ki artylli ki skul, ka long ba haduh ba la kut ka por ba la buh, ki la lah ba kin iakhaid da mar shi kol, ha kaba ka Sibsingh Memorial Govt. Sec. School ha ka minit kaba san ka la ioh ba kan pynkhih nyngkong ia ka jar lyngba ka Younisha Thabah, katba ka Saiden Secondary School ka la iakhun tyngeh tad haduh ba kan da ioh ba kan pynphai kylla ia kaneka shi kol lyngba ka Daphishisha Syngkli ha ka minit kaba 60+3.

Katba ki kol lyngba ka Larihun Songthiang (4, 21 mins), Melaribha Lyngdoh (25mins) bad Sodawanki Suchiang (42 mins) ka la biang pura ia ki thei ialehkai jong ka Iewrynghep Secondary School(East Khasi Hills) ba kin lah ban pynliem noh da 4-2 ia ka North Liberty Hig. Sec. School (West Jaintia Hills), ia ki artylli ki kol ka North Liberty la ioh ban thep ia ki da ka Deigracia Dan (8 mins) bad ka Beatify Shylla (29 mins).