Lashai ka sngi ka jingdawa buh National Law School ha rilum Jaintia

Syllad | The Rising MeghalayaSeptember 14, 2022

Ka Society for the Study of Law kala khot iaka jingialang paidbah lashai ka sngi 15 tarik Nailur ha Chutwakhu ban iakren sani halor ka jingdawa ban buh iaka National Law School ha Rilum Jaintia.

Kane ka jingialang kan long ha Indoor Hall Chutwakhu, Jowai haka por 4 Pm.

U Secretary Society for the Study of Law, u ma JB Laloo ula ong ba kane ka jingialang ka dei ban iakren halor ka memorandum ne ka dorkhat kaba la ai sha sorkar na ka bynta ban buh iaka shlem pule National Law School ha rilum Jaintia kaba dangshen ka sorkar kala pynbna ban buh ia kine ki skul haka jylla.

Ka society haka dorkhat kaba la ai sha ka sorkar kala pynpaw ruh ba ka kloi ban aiti iaka Khadar Daloi Law College ban pyniaid da ka sorkar Meghalaya na ka bynta kane ka kam ba bha.

Ha kane ka jingialang la khot ia baroh ki nongialam shnong ban kyrpad iaki ban ai ka jing kyrshan ia kane ka jingdawa jong ka society na ka bynta ka bha ka miat ka rilum Jaintia, kaba da ka jingdon kane ka skul bah kan wanrah iaka jingiaryngkat kyrdan bad kiwei pat skul bah hapoh ka ri.

Ka Society kala khot wer ia baroh ban ai jingkyrshan halor kane ka jingdawa ia ka National Law School namar ba ka rilum Jaintia haduh mynta mynne ba ka jylla kala kynjoh sha ka 50 snem ka jingioh jylla ba pura, pynban tang kawei jaka pule State Level ne National Level educational institution kam don.