Lashai yn iakynduh u CM ka Assam-Meghalaya ban iakren halor ka kam ia pynbeit pud

Syllad | The Rising MeghalayaSeptember 29, 2023

Ka jingiakren halor ka kam ia pynbeit pud hapdeng u Myntri Rangbah ka Assam bad Meghalaya kan long lashai ka 30 tarik (Sngi Saitjain) hapoh State Guest House (Koinadora), Khanapara, Guwahati ha ka por 1 baje nohphai sngi.

Ha kane ka jingiakren ha ka kylla kaba ar hapdeng u CM ka Meghalaya u Conrad K Sangma bad u CM ka Assam u Himanta Biswa Sarma kan long halor ki hynriew tylli ki jaka kiba dang sahteng kiba don hapdeng ka jingiakajia hapdeng kine ki ar jylla.

Haba pyntip ia kane u Symbud Myntri Rangbah ka jylla u Bah Sniawbhalang Dhar u la ong ba ia ka mat kaba iadei bad ka shnong Lapangap ruh yn rah lang ha kane ka jingiakren ka ban long lashai ka sngi.

“Ngin iakren ruh halor ka mat kaba iadei bad ki jingjia jong ka jingiakynad kiba la jia ha ka shnong Lapangap.Ngin sa shim ia ka rai kaba khatduh hadien ka jingimir jingmut lang hapdeng ki ar jylla,” ong u Bah Dhar, uba dei ruh u Chairman jong ka regional committee na ka bynta ka West Jaintia Hills District.

Da kaba pynpaw ba la lah ban tehlakam ia ka jinglong jingman, u Dy. CM u la ong ba ka shnong Lapangap kam hap satia ha ka jaka kaba don hapdeng ka jingiapher jingmut. Hynrei haba ki nongshong shnong ka Lapangap ki la leit ban kheit ia u Kba na ki pyntha ki jong ki, dei ha kaba kum kane ka por ba ka la mih ka jingiakajia. Kumta ruh u la ong ba kin sa peit lashai ka sngi kaei ka rai kaba kin shim ha kaba iadei bad kane ka bynta.

Nalor kata une u Myntri u pyntip ruh ba na ka liang ki Deputy Commissioner napoh Assam bad Meghalaya ruh kin aiti ia ki kaiphot jong ki ha kaba iadei bad katei ka jingjia ha kane ka jingialang hapdeng kine ki arngut ki CM.

“Ngin pyrshang ban weng ia kane ka mat bad ngi kwah ban pynneh ia ka shongsuk shongsain la ka long kumno kumno ruh,” u la ong shuh shuh.

Ka jingiakynad kaba dang shen hapdeng ki paid Karbi bad ki nongshong shnong kiba dei ki Khasi Pnar ka la khie ha ka shnong Lapangap ha ki bynta khappud bad ka Assam namar ki mar rep kiba don ha kawei ka jaka rep naduh ka 26 tarik mynta u bnai.

Na ka liang ki bor sorkar ki la phah shuh shuh ia ki kynhun pulit  sha katei ka jaka na ka bynta ban wanrah pat ia ka shongsuk shongshngain.