Lashai yn rah lama iong ka synjuk waheh shnong Jowai ba pynkynriah iaka North Jowai Division

Syllad | The Rising MeghalayaNovember 8, 2020

U president jong ka Waheh Shnong Urban Jowai u ma Alan Niangti ula iathuh ba lashai ka sngi 9 tarik Naiwieng kin sdang iaka jingiakhih paidbah ba jai ba jai ban dawa naka sorkar ban pyndam iaka jingpynkynriah iaka North Jowai Division sha Shangpung.

U Ma Alan ula iathuh baka jingiakynduh jong ki ia u MLA Jowai u ma Wailadmiki Shylla kam poi shaei shaei, hynrei kum ki nongialam kiba sngewkhia ia kane ka rai kaba kyrkieh jong ka sorkar bad kim banse ban mih sha surok ban dawa naka sorkar ban pyndam iaka jingpynkynriah ia kane ka ophis kaba rim tam ha Jowai sha Shangpung.

“Ngim pdiang ia kane ka jingpynbeit ka sorkar jylla namar ba kane ka jingrah ia kane ka ophis kan wanrah tang ka jingthud iaka rukom treikam ka PWD North Division kumjuh iaki paidbah kiba donkam ia kane ka ophis na ki shnong bapher bapher,” la ong u ma Alan.

Ula kyntu ruh iaki sengbhalang bad ki paidbah kiba sngewkhia ia kane ka rai kyrkieh jong ka sorkar ban ia mih sha ka ophis jong ka North Jowai Division ha Ladthadlaboh.   

Ka sorkar Jylla kala dep pynbna ban wanrah da ka mini secretariat ha ka jaka ka PWD ha North Jowai Division bad u Myntri Rangbah ka Jylla Conrad K Sangma ruh ula wan jurip iaka jaka bad ula ong kane ka jaka ka dei kaba biang bha ban tei iaka mini secretariat haka sngi Saitjain.

U Conrad K Sangma ula ong ka jing kynriah ia kane ka ophis North Jowai Division sha Shangpung ka dei halor ka nongrim ba kiba bun ki surok ba peit kane ka tnad ki hap haka Raliang bad Mowkaiaw ka thain ba mihkhmat da u ma Coming on Ymbon bad u Nujorki Sungoh. Ula ong ruh ba ka Shangpung ruh ka donkam ban kiew haka roi ka par bad ban pynsted iaki kam jong ki engineer bad ki nongtrei ka PWD North Jowai Division kan kham suk ban don kane ka ophis ha Shangpung.