Lashai yn shong jingialang ka tnad pule puthi halor ka jingduh admission ki khynnah klas XI

Syllad | The Rising MeghalayaOctober 3, 2021

U Myntri ka tnad Pule Puthi Ma Lahkmen Rymbui ula iathuh ba lashai ka sngi Nyngkong yn shong jingialang review meeting halor ka jingkyrduh admission ki khynnah pule kiba ban shong klas XI ban pynjem ia kane ka jingeh ki khynnah pule.

U Ma Lahkmen ula ïathuh ba haka sngi Palei, ka taiew kaba la dep ruh ula klhot jingialang ia u Additional Chief Secretary bad u Secretary Education ban ïakren halor ka jingduh admission ki khynnah pule klas XI.

Ula ong ba ka jingpass ki khynnah pule na rilum Jaintia ka long tang 5791 ngut bad katba ki jaka pule ki la dep ai admission ki long haduh 6113.

Ki jaka pule ki bun ha rilum Jaintia, hynrei lada ki khynnah kin jied ban pule tang ha kawei ka jaka pule ka lah ban wanrah ïa ka jingeh ban pynbiang admission ne pynrung klas iaki khynnah ha kawei ka jaka, la ong u Myntri. Ula ong shuh shuh “Ngam sngewthuh na kano ka daw ba ki samla pule ki duh admission haba ka jingai admission ka long palat ïa ka jingpass ki khynnah pule bad lehse ka don ruh ka jingthep admission bun jaka u/ka wei u khynnah ha ki jaka pule.

Na kaliang ka JSU, JYF, KSU bad kiwei kiwei ki seng ruh kila iakren bad ki bor pyniaid skul ban wad ki lad ki lynti halor kane ka jingeh ne kyrduh admission ki khynnah kiba dang shu pass matrik.

Kumba ka long bun hi ki khynnah ki thep admission ha Kiang Nangbah Government Higher Secondary School bad kumba 900 ngut eiei ki khynnah kiba kwah rung klas ha kane ka jaka pule kim ioh admission.

Ka JYF kala ong ba kino kino ki khynnah bym pat ioh admission ki lah ban wan ai kyrtengt ha ophis treikam jong ha Mookyrdup, Jowai. Ka JYF kala kyntu iaka sorkar ban pynbeit mardor ia kane ka jingeh jong ki khynnah pule ban khanglad iaka jingpep pule shiteng por.